Ռուսական «Կոմսոմոլսկայա պրավդա» թերթն անդրադարձել է Մոսկվայում երեք քույրերի կողմից հոր՝ Միխայիլ Խաչատուրյանի դաժան սպանությանը՝ զրուցելով հանգուցյալի որդու՝ Արսեն Խաչատուրյանի հետ:
Նախքան հոր հուղարկավորությունը նա հրաժարվում էր հարցազրույց տալ որևէ մեկին՝ միայն պնդելով, որ ԶԼՄ-ներում պատկերված իր հոր կերպարը սխալ է:
-Անձամբ ես չեմ հասկանում՝ որտեղից է գալիս այդ տեղեկատվությունը: Մարդը զբաղվում էր բարեգործությամբ: Գնում էր սրբավայրեր:
– Բայց դրա հետ մեկտեղ նա պաշտոնապես ոչ մի տեղ չէր աշխատում:
– Այո, բայց նա բազմաթիվ կարեկիցներ ուներ: Մարդիկ գիտեին՝ ինչով է նա զբաղվում, և օգնում էին նրան:.
-Շատերը գրում են, որ նա ծառայել է Աֆղանստանում:
– Ճիշտ չէ, չի ծառայել:
– … ծաղրուծանակի է ենթարկել դուստրերին:
– Դարձյալ սուտ է: Հազարերորդ անգամ եմ ասում. բացե՛ք «Օդնոկլասսնիկի»-ում նրա էջը և կհասկանաք՝ ինչ մարդ էր նա:
– Ի՞նչ եք կարծում՝ ինչու են Ձեր քույրերն այդպես վարվել:
– Ես չգիտեմ: Բայց սպանությունը կանխամտածված էր: Ես նրանց տեսել եմ այդ մղձավանջից երկու օր առաջ: Բայց տարօրինակ ոչ մի բան չեմ նկատել: Ես չեմ հերքում, որ հայրս խիստ էր: Եվ անգամ դաժան: Բայց արդոք դրա համար սպանո՞ւմ են: Այո՛, թույլ չէր տալիս այլանդակ կյանք վարել (ըստ հարևանների՝ հոր բացակայությամբ աղջիկները երեկույթներ էին կազմակերպում, մարիխուանա ծխում, բարձր երաժշտություն միացնում գիշերվա ժամերի- խմբ.): Եվ եթե պատժում էր, ապա դաստիարակելու համար:
– Դուք ինքներդ ի՞նչ պատիժ կցանկանայիք քույրերի համար:
– Արարքների համար պետք է պատասխան տալ… Եվ նրանք պատասխան կտան դատարանի առաջ: Աստված նրանց դատավոր:
Պատրաստեց՝ Վիկտորյա ԱՆԴՐԵԱՍՅԱՆԸ
