Վարչապետ Նիկոլ Փաշինյանի «Քաղաքացիական պայմանագիր» կուսակցությունն այդպես էլ չասաց, թե որ առավելության համար է «կարգին Հայկոն» դարձել Երեւանի քաղաքապետի իրենց թեկնածու: Այս մասին այսօր «Հենարան» մամուլի ակումբում լրագրողների հետ հանդիպմանն ասաց քաղտեխնոլոգ Արմեն Բադալյանը:
«ՀՀԿ-ին ենք քննադատում, երբ առանց պատճառաբանելու պաշտոններ էր տալիս մարդկանց, բայց հիմա ՔՊ-ն չի ասում, թե որ արժանիքի համար է Հայկ Մարությանը թեկնածու առաջադրվել»,-նկատեց նա:
Արմեն Բադալյանի կարծիքով՝ ՀՀ նոր իշխանության կադրային քաղաքականությունն առհասարակ ճիշտ չէ. «Ստացվում է, որ ժողովրդական շարժման օրերին ով փողոցում իրենց հետ քայլել է, պաշտոն է ստանում»:
Բանախոսի համոզմամբ՝ կան այլ մասնագետներ, որոնց ներուժը չի օգտագործվում. «Այլ կուսակցություններում լավ կադրեր չկա՞ն: ԲՀԿ-ն եւ ՀՅԴ-ն կոռուպցիոն գործընկերներ են դիտվում, բայց մյուս կուսակցությունների ներուժն ինչո՞ւ չի օգտագործվում: Կադրային քաղաքականությունը հաջողված չէ: Շատերը սփյուռքից ասում են, որ հեղափոխական էյֆորիան մարում է: Դա կազդի բիզնեսի եւ մնացած ամեն ինչի վրա»:
Փորձագետը կանխատեսում է, որ առաջիկայում սպասվելիք արտահերթ խորհրդարանական ընտրություններին ՔՊ-ն առանձին կմասնակցի. «Ամենայն հավանականությամբ, «Ելք» դաշինքը կպառակտվի»:
https://www.facebook.com/aravot.am/videos/2112551178763386/
Լուիզա ՍՈՒՔԻԱՍՅԱՆ
