Այսօր վարչապետին առընթեր ընտրական օրենսդրության բարեփոխումների հանձնաժողովը «Համայնքների ֆինանսիստների միավորում» ՀԿ-ի հետ համատեղ քննարկում էր կազմակերպել՝ ՏԻՄ մարմինների ձևավորման կարգավորումների վերաբերյալ առաջարկներ և տեսակետներ հավաքագրելու նպատակով:
Վարչապետին կից ԸՕ բարեփոխման հանձնաժողովի անդամ, ՔՊ վարչության անդամ Վահագն Հովակիմյանն ասաց, ավագանիները ենթարկվում էին ՀՀԿ-ին, համակարգը խարխլված էր, ուստի այս կամ այն մոդել չէր աշխատում՝ այդ իրողություններից ելնելով:
Տարածքային կառավարման եւ զարգացման փոխնախարար Վաչե Տերտերյանը հայտարարեց. «Այդպես չի, պարոն Հովակիմյան, ավագանիները, ճնշող մեծամասնությամբ, համայնքների ղեկավարների կցորդն էին, որն ավելի վատ է: Ես ձեր ասածն ավելի սրում եմ»:
Տերտերյանն ասաց, որ Աշտարակի պես քաղաքում ավագանին ընտրվում է 200 ձայնով, Դիլիջանում 300 ձայն ստացած ավագանի ունենք. «Մոդելը ինքը երաշխիք չի որեւէ խնդրի: Երաշխիք կարող է լինել մոտեցման մեջ, քաղաքական իրավիճակում, ընդհանուր մթնոլորտում: Իհարկե, մոդելներն ունեն ուժեղ ու թույլ կողմեր, դա պետք է քննարկենք, ոչ թե ասենք՝ մենակ այս դեպքում մենք կունենանք տեղական ինքնակառավարում»:
Տարածքային կառավարման եւ զարգացման փոխնախարար Դավիթ Գեւորգյանն էլ դժգոհեց, որ համայնքապետն ընտրվում է, կուսակցությունը նրա գործունեության համար քաղաքական պատասխանատվություն չի կրում. «Մենք ուզո՞ւմ ենք կուսակցությունները կայացնել, եթե ուզում ենք կայացնել, կուսակցությունների վրա տարբեր հարթակներով պետք է դնենք քաղաքական պատասխանատվության հարց: ՀՀԿ կուսակցության մեծ թվով ներկայացուցիչներ կան, արդյոք ՀՀԿ-ն այսօր քաղաքական պատասխանատվություն է կրում այդ համայնքի ղեկավարների համար՝ ոչ: Այդ համայնքում որոշումներ են կայացրել պայմանական Ժորա եւ ժորաներ, անհատական պատասխանատվություն են իրենք կրում: Մենք պառլամենտական կառավարման ենք անցնել, պետք է կայացնենք կուսակցությունները: Ասում եք՝ կուսակցությունների կայացումն ուզում ենք ՏԻՄ-երի միջոցով լուծել՝ ոչ: Մենք ընդհանուր համակարգի մեջ պետք է դիտարկենք: Մի համայնքում պայմանական Ժորան ու ժորաները ինչ-որ որոշում են կայացրել, դրա համար իրենք պետք է մենա՞կ քրեական, իրավական պատասխանատվություն կրեն, թե՞ նաեւ իրենց ներկայացնող ուժը պետք է կրի քաղաքական պատասխանատվություն: Ես գնամ հասկանամ՝ դու, որ այս քաղաքը սխալ զարգացման ուղով ես տարել, ո՞վ է դրա պատասխանը տվողը: Մեն ուզում ենք մարդկանց հետեւի՞ց գնալ: Երեւանում նախկին քաղաքապետ Տարոն Մարգարյանն ասոցացվում էր ՀՀԿ-ի հետ, ոչ թե նրա համար, որ ՀՀԿ-ն էր այդ ցուցակը ներկայացրել, այլ՝ Տարոն Մարգարյանը վաղուց է եղել այդ կուսակցության մեջ: Բայց եթե լինի մի մարդ, որն ընտրություններից 15 օր առաջ մտներ այդ կուսակցություն, չէինք ասոցացնելու նրան: Մենք պե՞տք է իրար կապենք, թե՞ չէ: Կներեք, մշակույթի նախարարը քաղաքակա՞ն պաշտոն է, թե՞ չէ, ինքը մենակ մշակույթո՞վ է զբաղվում: Տրանսպորտի եւ կապի նախարարը քաղաքակա՞ն պաշտոն է: Ի՞նչ է նշանակում ՏԻՄ մարմինները պետք չի քաղաքականացնել, բա ո՞վ պետք է կրի քաղաքական պատասխանատվություն, Մեղրիի, Կաթնաջրի, Գյումրիի համար ո՞վ պետք է պատասխանատվություն կրի: Ես չեմ ասում արգելենք քաղաքացիական հասարակություններին մասնակցել, բայց երբ մենք ուզում ենք քաղաքացիական նախաձեռնություններին, դաշինքներին տեղ տանք մասնակցելու, ես ոնց հասկանում եմ, դա ուզում ենք անել կուսակցությունները վերջնականապես թաղելու միջոցով»:
Քննադատություններին, որ կուսակցությունները մեր տունը քանդել են՝ փոխնախարարն արձագանքեց՝ «30 տարի մարդիկ չեն հավատացել ընտրությունների արդյունքներին, միգուցե ընդհանրապես ընտրություն չանցկացնե՞նք: Չի՛ լինի տենց: Ավագանին շատ լուրջ որոշումներ է կայացնում ու պետք է պատասխանատվություն կրի, որոշում է կայացնում հսկայական հեկտարներով հող ինչ-որ մեկին տալ, ինչ-որ մեկին թույլտվություն տալ»:
Փոխնախարար Գեւորգյանը հայտարարեց. «Հայաստանում կա խոշոր քաղաք՝ եկամտահարկ չի մուծել այդ քաղաքի ղեկավարը: Ինքը, իր կուսակցությունը, որ իրեն ներկայացրել է ընտրություններին, պե՞տք է պատասխանատվություն կրի, թե՞ չէ, թե՞ մենակ էդ մարդու վրա քրեական գործ հարուցենք ու վերջանա, անցնի գնա, հետո հետեւից գա էն մյուսը: Դուրս է գալիս, որ քաղաքական կուսակցությունը ինչ-որ մարդկանց ինչ-որ ցուցակներ ներկայացնում է, բայց հենց գալիս է պահը պատասխանատվություն կրելու՝ կուսակցությունը չկա»:
Թե որ խոշոր քաղաքի ղեկավարն է, որ եկամտահարկ չի մուծել, փոխնախարարը փակագծերը չբացեց:
Հռիփսիմե ՋԵԲԵՋՅԱՆ
