«Սուրբ Գրիգոր Լուսավորիչ» բժշկական կենտրոնի տնօրենի ժամանակավոր պաշտոնակատարը՝ Արման Հովակիմյանը, ԲԿ-ում արձանագրված չարաշահումների մասին խոսել չի ցանկանում: «Չեմ եկել այս բուժկենտրոն՝ չարաշահումներ փնտրելու: Վստահ եմ, որ խնդիրներն ի հայտ են գալու մեր բռնած ճանապարհին, մենք էլ դրանք լուծելով ենք առաջ գնալու»,- «Առավոտ»-ի հետ զրույցում ասում է նա:
Նոր տնօրենի առաջին «հրահանգը» բաժանմունքների վարիչներին հետեւյալն է. «Հորդորել եմ, որ նրանք ապահովեն բուժհաստատության բնականոն աշխատանքը, որպեսզի մեկ րոպե անգամ հիվանդներին ծառայություն մատուցելու խնդիր չլինի»:
Արման Հովակիմյանը նշեց, որ հուլիսի 27-ին, երբ անձնակազմը բողոքի ցույց էր անում եւ պահանջում նախկին տնօրեն Արա Մինասյանի վերադարձը, բուժկենտրոնի աշխատանքը կարճ ժամանակով կաթվածահար է եղել. «Բուժսպասարկման ոլորտում անընդունելի են ծառայության մատուցման հետ կապված խնդիրները՝ անկախ պատճառներից»:
Լուիզա ՍՈՒՔԻԱՍՅԱՆ
«Առավոտ» օրաթերթ
31.07.2018
