«Ինձ մտահոգում է անհանդուրժողականության մթնոլորտը՝ այլակարծության մերժումը, որն ընդհանուր միտում է»,-«Հայելի» մամուլի ակումբում այսօր անդրադառնալով Մարտի մեկի գործով ՀՀ երկրորդ նախագահ Ռոբերտ Քոչարյանի կալանավորման շուրջ հասարակական արձագանքներին, ասաց «Ազգ» օրաթերթի գլխավոր խմբագիր Հակոբ Ավետիքյանը: «Կարծես Տեր-Պետրոսյան-Քոչարյան հակամարտությունը շարունակվում է: Ատելության մթնոլորտ կար, որը հիմա էլ եմ տեսնում: Մամուլի վրա ճնշումները զգալի են»,-նշեց նա:
Ինչ վերաբերում է երկրորդ նախագահին առաջադրված մեղադրանքին, թե նա մի խումբ անձանց հետ նախնական համաձայնությամբ սահմանադրական կարգ է տապալել, Հակոբ Ավետիքյանն ասաց. «Այդ ձեւակերպումը համոզիչ չէ, միաժամանակ՝ մտահոգիչ: Գուցե հետագայում ավելի լայն բնորոշումներ լսենք եւ փաստեր տեսնենք»:
Լրագրողները հետաքրքրվեցին՝ «Ռոբերտ Քոչարյանի կալանավորումը համարո՞ւմ եք վենդետա՝ ՀՀ նոր իշխանությունների կողմից»: Հակոբ Ավետիքյանը պատասխանեց. «Եթե անգամ անձամբ Նիկոլ Փաշինյանի մոտ «վենդետա» չկա, նա գտնվում է մի անձի ազդեցության ներքո, որը Լեւոն Տեր-Պետրոսյանն է, որն անընդհատ ատելություն եւ վրեժխնդրություն է արտաշնչում, նրա բոլոր քայլերը դրան են հանգեցրել: Այս ամենից լավ հետեւանք չեմ զգում»:
Հակոբ Ավետիքյանն այնուհետեւ նշեց, որ Սահմանադրությամբ՝ նախկին նախագահը չի կարող մեղադրվել այն գործողությունների համար, որոնք բխել են իրեն սահմանադրությամբ վերապահված լիազորություններից. «Այս առումով ինձ համար անհեթեթ է թվում կալանավորման փաստը: Եթե նա արտակարգ դրություն է մտցրել, դա բխում է իր իրավասություններից, եւ դրա համար նրան չի կարող մեղադրանք առաջադրվել: Կարծում եմ՝ կալանքի որոշումը սխալ էր: Նույնը կարող եմ ասել նաեւ ՀԱՊԿ գլխավոր քարտուղար Յուրի Խաչատուրովի մասին»:
Հակոբ Ավետիքյանին չի գոհացնում Խաչատուրովին փոխարինելու գործընթացի շտապողականությունը. «Դա անվտանգության խնդիր է: Այդ պաշտոնը մեզ համար կարեւոր է՝ առնվազն այն առումով, որ մեր իշխանությունները տեղյակ լինեն ՀԱՊԿ դաշնակիցների հետ կատարվող իրադարձությունների մասին»:
Լուիզա ՍՈՒՔԻԱՍՅԱՆ
Իրավիճակը շատ պարզ է: Իշխանության են եկել նեո-ՀՀՇ-իստները: Մնացածը տեխնիկական հարցեր են: