Վարչապետ Նիկոլ Փաշինյանը հուլիսի 26-ին Սանկտ Պետերբուրգում հայ գործարարների հետ հանդիպմանը հայտարարեց. «Իսկ ո՞վ է ֆինանսավորել մեր հեղափոխությունը. Սա շատ կարեւոր հարց է…Մենք հրապարակել ենք հաշվետվությունը, թե ով է ֆինանսավորել, ես ափսոս տոկոս չեմ հանել, բայց համոզված եմ՝ այդ ֆինանսավորման մոտավորապես կեսը եկել է ՌԴ-ից՝ Ռուսաստանի հայերից: Սախալինից քայլարշավի ընթացքում ինձ զանգել են ու գումար են փոխանցել մեզ, երբ մենք Լոռու մարզ չէինք մտել: Ամենամեծ ֆինանսավորողը մեր հեղափոխության եղել է Ռուսաստանի հայությունը, այստեղ ոչ մի կասկած չկա: Մենք աշխարհագրությունը չենք հրապարակել՝ սխալ ենք արել: Մեր ամբողջ հեղափոխությունը ֆինանսավորել է 90 տոկոսով սփյուռքը, եւ այդ 90 տոկոսի մեջ առնվազն 50 տոկոսը եղել է Ռուսաստանի հայերինը, եթե ոչ ավելի: Պետք է վերլուծությունն անել ու հրապարակել: Երկրորդը եղել է ԱՄՆ-ն, Եվրոպան, բայց ամենամեծ բաժինը միանշանակ եղել է Ռուսաստանի հայերը»:
Այս առնչությամբ Aravot.am-ի հետ զրույցում քաղաքագետ Աղասի Ենոքյանը մեր հարցին՝ ֆինանսավորման աշխարհագրությունը երբ բացում է Փաշինյանը, սրանից կարո՞ղ ենք եզրակացնել, որ ավելի շատ ռուսական գիծ կա այս հեղափոխության մեջ՝ պատասխանեց. «Այստեղ երկու բան կարելի է ասել. առաջինն այն է, որ նրանք Ռուսաստանի այն հայերն են, որոնք դժգոհ են եղել Սերժ Սարգսյանի իշխանությունից եւ այստեղից գնացել են՝ փորձելով պաշտպանել իրենց բիզնեսը, փորձելով իրենց պաշտպանել այդ իշխանության ժամանակ: Եվ, բնականաբար, նրանց խնդիրը պետք է լիներ Սերժ Սարգսյանին իշխանությունից հեռացնելը եւ այդ պրոցեսները ֆինանսավորելը: Սա նկատվում է նաեւ Նիկոլ Փաշինյանի գործողություններում, որովհետեւ խնդիրը այդ իշխանության վերացումն էր եւ նորի կառուցման մասին դեռ խնդիր դրված չի: Երկրորդ կարեւոր գործոնն այն է, որ Ռուսաստանում ցանկացած բիզնես, քիչ թե շատ լուրջ բիզնես գտնվում է պետության «ակնդետ ուշադրության» տակ: Այսինքն, բոլոր լուրջ բիզնեսներն այնտեղ պետության կողմից վերահսկվում են եւ այդ առումով բնական է՝ Ռուսաստանի կողմից ֆինանսավորվող հեղափոխությունը չէր կարող հակառուսական արդյունք ստանալ: Արդյունքը բնականաբար պետք է լիներ այն, ինչ ունենք»:
Աղասի Ենոքյան
Խոսելով հայկական հեղափոխության վրա Պուտինի ազդեցության մասին՝ Աղասի Ենոքյանն ասաց. «Քանի որ հստակ քաղաքական գերակայություններ դրված չեն, մասնավորապես՝ արտաքին քաղաքական, Փաշինյանի թիմը մի բան հստակ գիտի, որ Ռուսաստանը կարող է մեծ պրոբլեմներ ստեղծել եւ մեծ վնասներ ստեղծել Հայաստանի համար եւ այդ պատճառով հիմնական քաղաքական գիծը, որ իրենք բռնել են, դա Պուտինին չջղայնացնելն է: Այսինքն, այստեղ լուրջ համադրում չկա Հայաստանի շահերի, Ռուսաստանի շահերի, ապագայի տեսլականի: Հիմա գոնե օպերատիվ մակարդակով այդ գիծն է առաջ տանում եւ երեւի թե միշտ չէ, որ ստացվում է: Մի թարմ օրինակ բերեմ՝ ՀԱՊԿ անդամ մյուս երկրների հետ չխորհրդակցելով՝ ՀԱՊԿ գլխավոր քարտուղար Յուրի Խաչատուրովի հանդեպ քրեական հետապնդում սկսելը եւ նրան հետ կանչելը, կարծում եմ, իսկապես ջղայնացրել է Պուտինին եւ մյուս գործընկերներին: Դա ուղղակի մի թարմ օրինակ է: Քանի որ չկա ընդհանուր ուղղություն, կարող են լինել եւ նման կազուսներ»:
Հռիփսիմե ՋԵԲԵՋՅԱՆ
