«Չէր կարելի Ռոբերտ Քոչարյանին այդպես նվաստացնել»,- «Հայելի» ակումբում լրագրողների հետ հանդիպմանը հայտարարեց Գերագույն խորհրդի պատգամավոր Ազատ Արշակյանը:
Ըստ պարոն Արշակյանի՝ պետք էր հարգալից վերաբերմունք դրսևորել, քանի որ նա 10 տարի ՀՀ նախագահն է եղել:
Պարոն Արշակյանի համոզմամբ՝ նույնիսկ պետք չէր ստորագրություն վերցնել, պետք է մեծ հարգանք լիներ. «Նախագահի պաշտոնն է հարգարժան, միջանձնային հարաբերությունները պիտի մի կողմ դրվեն: Չէր կարելի նրան նվաստացնել: Նա 10 տարի ՀՀ ղեկավարն է եղել, նրան ասպետական պիտի ասեի, թե քննություն է գնում և քննության շահերից ելնելով՝ պիտի լինեք Երևանում, հասանելի: Պետք է զգուշացնեին, թե հրավերի դեպքում պետք է ներկայանաք հարցաքննության: Վեհափառի նկատմամբ էլ չի կարելի այդպես վարվել»:
Պարոն Արշակյանն այս համատեքստում շեշտեց, թե առավել ևս, գործընթացին մասնակցության պատրաստակամություն Ռոբերտ Քոչարյանը հայտնել էր: Ըստ պարոն Արշակյանի՝ եթե հարգալից ձևով դա արվեր, բոլորս կշահեինք:
Պարոն Արշակյանի կարծիքով՝ կարևորը քաղաքական գնահատական տալն է:
Անդրադառնալով Ռոբերտ Քոչարյանի պաշտոնավարման տարիներին՝ Ազատ Արշակյանն ասաց. «Այդ տարիներին Հայաստանը վասալացավ: Ուստի պետք է քաղաքական գնահատական տալ՝ արդյոք այդ տարիներին ՀՀ-ի ինքնիշխանությունն ավելացավ, թե նվազեց»:
Ազատ Արշակյանի կարծիքով՝ 1937 թվականից ավելի խիստ պետք է լինել. «Էներգիան պիտի ավելին լինի ՀՀ-ում ընդդեմ քրեականության: Ես գտնում եմ, որ ՀՀ-ում պետք է դաժան պայքար լինի նրանց դեմ, որոնք այս տարվա մայիսի 1-ին և 8-ին ելույթ ունեցան և կարմիր բանակը հրավիրում էին Հայաստան: Հիմա էլ Ռոբերտ Քոչարյանին պաշտպանողներն ասում են, թե մենք հրավիրում ենք որևէ ուժ, թող գա, միջամտի ՀՀ-ին: Նրանց հարկավոր է զրկել խոսքի, տեղաշարժվելու ազատությունից»:
Տաթև ՀԱՐՈՒԹՅՈՒՆՅԱՆ
