«Ելքի» նախընտրական ծրագրում խոստում կար, որ «Կստեղծվի Հայաստանի խորհրդարանի երկրորդ պալատը, որը կազմված կլինի Սփյուռքի հայկական գաղութների ներկայացուցիչներից, ովքեր կընտրվեն հենց գաղթօջախներում անցկացվող ընտրությունների միջոցով»:
Aravot.am-ը Վարչապետին կից «Ընտրական օրենսգրքի» բարեփոխումների հանձնաժողովի քարտուղար Դանիել Իոաննիսյանին հարցրեց՝ այս առումով «Ընտրական օրենսգրքում» համապատասխան փոփոխություններ չե՞ն նախատեսվում՝ Դանիել Իոաննիսյանը պատասխանեց. «Ճիշտն ասած, չգիտեմ, բայց հետեւյալն ասեմ՝ անկախ նրանից, թե դա լավ միտք է, վատ միտք է, Սահմանադրությամբ կարգավորվող հարց է: Մենք «Ընտրական օրենսգիրքը» գրում ենք գործող Սահմանադրության սահմաններում: Մենք ուղղակի չենք քննարկում այն հարցերը, որոնք հակասում են ներկայիս սահմանադրական կարգավորումներին: Խորհրդարանը կլինի երկպալատանի, եռապալատ, թե ինչ, դա Սահմանադրությամբ կարգավորվող հարց է, որը մենք այս պահին չենք քննարկում»:
Հռիփսիմե ՋԵԲԵՋՅԱՆ
