«Մեր քայլերը համապատասխանում են ՀԱՊԿ համաձայնագրի դրույթներին»,-լրագրողների հետ հանդիպմանն այսօր անդրադառնալով Մարտի 1-ի գործով ՀԱՊԿ գլխավոր քարտուղար Յուրի Խաչատուրովի հանդեպ քրեական հետապնդմանը (մեղադրվում է սահմանադրական կարգը տապալելու համար), ասաց ՀՀ ԱԳՆ մամուլի խոսնակ Տիգրան Բալայանը:
Հիշեցնենք, որ ՀՀ-ն ՀԱՊԿ գործընկերներին առաջարկել է սկսել գլխավոր քարտուղարի փոփոխման գործընթացը:
«Այժմ այդ ուղղությամբ ակտիվ քննարկումներ եւ շփումներ են իրականացվում մեր ՀԱՊԿ գործընկերների հետ»,-հայտնեց Տիգրան Բալայանը:
Նրա խոսքով՝ ՀՀ-ի կողմից ՀԱՊԿ գործընկերներին դիմելու նախաձեռնությունը հիմքեր ունի. «Մեր ներգրավվածությունը ՀԱՊԿ-ում նպատակ ունի նպաստել կառույցի ուժեղացմանը: ՀՀ-ն տրամադրված է չանել որեւէ քայլ, որից կտուժի ՀԱՊԿ հեղինակությունը: Այն պետք է շարունակի իր բնականոն աշխատանքը: Այս մասին մենք տեղեկացրել ենք մեր ՀԱՊԿ գործընկերներին»:
Տիգրան Բալայանն ընդգծեց, որ Յուրի Խաչատուրովը դեռեւս ՀԱՊԿ գլխավոր քարտուղարն է. «Քանի դեռ ՀԱՊԿ խորհուրդը որոշում չի կայացրել նրան փոխարինելու, նա շարունակում է պաշտոնավարել: Պարզ է, որ նրան որեւէ մեկը պետք է փոխարինի, բայց նա այս պահին հանդիսանում է գլխավոր քարտուղար: Թե ով կփոխարինի նրան, ինչպես եւ ինչ ժամանակահատվածում, քննարկումների արդյունքում պարզ կլինի»:
Լուիզա ՍՈՒՔԻԱՍՅԱՆ
