Ծանրամարտի Հայաստանի մինչեւ 15 եւ 17 տարեկան տղաների եւ աղջիկների հավաքականները Իտալիայում անցկացված Եվրոպայի առաջնությունից այսօր վերադարձան տուն:
«Զվարթնոց» օդանավակայանում նրանց դիմավորեցին ՀՀ սպորտի եւ երիտասարդության հարցերի նախարար Լեւոն Վահրադյանը, փոխնախարարներ Գաբրիել Ղազարյանը եւ Սարգիս Ավագյանը, ծանրորդների հարազատները:
Աղջիկների ավագ մարզիչ Վիգեն Խաչատրյանը «Զվարթնոց» օդանավակայանում Aravot.am-ի հետ զրույցում ասաց, որ շատ գոհ է իր սաների մասնակցությունից: Նրա համար Մարգարիտա Առաքելյանի, Լիանա Գյուրջյանի ոսկե եւ Միլենա Խաչատրյանի բրոնզե մեդալները անակնկալ չէին: Ինչ վերաբերում է Բուենոս Այրեսի պատանեկան օլիմպիական խաղերի վարկանիշ նվաճելու համար պահանջված թիմային 1-ից 4-րդ տեղերն զբաղեցնել չկարողանալուն, պարոն Խաչատրյանն ասաց, որ պատանեկան օլիմպիական խաղերի մեկ վարկանիշի ճակատագիրը դեռ վերջնականապես որոշված չէ: Նրա խոսքով, ուղեգիր ավելի վաղ նվաճած երկրներ կան, սակայն նրանք դոպինգի պատճառով որակազրկվել ու չէին մասնակցում: Այնպես որ, հնարավոր է՝ այդ ուղեգիրը մեր ֆեդերացիային հատկացվի:
Աշոտ ՀԱԿՈԲՅԱՆ
