Ադրբեջանի նախագահ Իլհամ Ալիևն ընդունել է Եվրամիության՝ Հարավային Կովկասի հարցերով հատուկ ներկայացուցիչ Տոյվո Կլաարին. հանդիպմանն անդրադարձ է կատարվել նաև Արցախի հիմնախնդրին, հաղորդում է ԱՊԱ-ն:
Հանդիպմանը Ալիևը հիշեցրել է Բրյուսելում վերջերս ունեցած հանդիպումը ԵՄ խորհրդի նախագահ Դոնալդ Տուսկի հետ և նշել, որ այդ այցի ընթացքում ունեցած արդյունավետ բանակցությունները և Ադրբեջանի ու ԵՄ-ի միջև ստորագրված «Գործընկերության առաջնահերթության» մասին փաստաթուղթը կարևոր են համագործակցության հետագա զարգացման համար: Ալիևն ընդգծել է, որ այդ փաստաթղթի վավերացումը ևս մեկ անգամ ցույց է տալիս, որ Ադրբեջանը մեծ նշանակություն է տալիս Եվրոպայի հետ կապերին:
Ադրբեջանի նախագահը նաև նշել է, որ իր երկիրը ՆԱՏՕ-ի հուսալի գործընկերն է, որը բարձր է գնահատում Ադրբեջանի մասնակցությունն Աֆղանստանի խաղաղապահ գործունեությանը:
Տոյվո Կլաարն իր հերթին նշել է, որ ԵՄ-ի և Ադրբեջանի միջև լավ հարաբերությունները հիմք են հետագայում համագործակցության ընդլայնման համար: Նա հույս է հայտնել առաջիկայում Ադրբեջանի հետ ստորագրել նոր համաձայնագիր:
Հանդիպման ընթացքում կողմերը կարծիքներ են փոխանակել նաև համագործակցության հեռանկարների, Արցախի հակամարտության շուրջ հայ-ադրբեջանական կարգավորման, ինչպես նաև տրանսպորտի, առևտրի և զբոսաշրջության ոլորտներում կապերի զարգացման վերաբերյալ:
Պատրաստեց՝ Վիկտորյա ԱՆԴՐԵԱՍՅԱՆԸ
