«Սուրբ Գրիգոր Լուսավորիչ» բժշկական կենտրոնի նոր տնօրենը՝ բժշկական գիտությունների թեկնածու, սրտային վիրաբույժ Արման Հովակիմյանն այսօր առաջին անգամ հանդիպումներ ունեցավ բաժանմունքների վարիչների հետ:
«Իմ՝ այստեղ գալու պատճառը ոչ թե կադրային ջարդ կամ առանց հասկանալու՝ կտրուկ փոփոխություններ անելն է, այլ կառուցողական մթնոլորտում բուժկենտրոնի աշխատանքը կազմակերպելը»,-Aravot.am-ի հետ զրույցում ասաց նա: Վստահեցրեց, որ ցանկանում է բոլոր խնդիրները վերհանել եւ լուծման տարբերակներ առաջարկել:
«Իսկ թե ինչպիսին է լինելու մեր գործելաոճը, ասեմ, որ նախընտրելու ենք կառուցողական երկխոսության մթնոլորտում աշխատել, որն ի վերջո ծառայելու է բուժկենտրոնին եւ անձնակազմին»,-վստահեցրեց Արման Հովակիմյանը:
Հավելենք, որ նա երկար տարիներ «Նորք-Մարաշ» բժշկական կենտրոնում աշխատել է որպես սրտային վիրաբույժ:
Նա գնահատականներ ունի նաեւ օրերս ԲԿ-ի նախկին տնօրեն Արա Մինասյանին սատարող բժիշկների բողոքի ցույցի մասին. «Չլինեի ես, այլ մեկ ուրիշը, իրականությունն այն է, որ նոր տնօրեն գոյություն ունի: Իմ նպատակը միայն բարի է՝ բուժկենտրոնը դարձնել լավագույնը»:
Լուիզա ՍՈՒՔԻԱՍՅԱՆ
