«400 000-ի ավելի մարդ աշխատում է գյուղական համայնքներում: Գյուղական աշխատանքի արտադրողականությունը ամսական կազմում է 550 դոլար: Աշխատանքի արտադրության այս չափը խայտառակություն է, եթե այդքան է իսկապես, ապա իմաստազրկվում է գյուղում աշխատելը»,- խորհրդարանում ընթացող «Համայնքներում առկա խնդիրները, տարածքային համաչափ զարգացման հնարավորությունները ՀՀ-ում» թեմայով քննարկման ժամանակ կարծիք հայտնեց «Ծառուկյան» խմբակցության պատգամավոր, ԱԺ փոխնախագահ Միքայել Մելքումյանը:
Խոսելով հարկային օրենսդրության եւ վարչարարության խնդրի մասին, նա ասաց, որ խոսել է գյուղերում այն անձանց հետ, ովքեր կրպակներ ունեն եւ դժգոհում են. «Պատճառն այն է, որ նախկինում ապրանքի մատակարարման համար պետք է փաստաթղթավորեին, շրջանառությունը մեծ էր, բայց մի մասն էին ՀԴՄ խփում, հիմա երբ որ ապրանք մատակարարումները ամբողջ ապրանքը փաստաթղթավորում են, ստիպված բոլորը ՀԴՄ-ները պետք է խփեն, չի կարող չխփել, արդյունքում մուտքները նույն են, բայց հարկերը ավելացել են եւ փակվում են»:
Նա կարծում է, որ այս հարցին հատուկ ուշադրություն պետք է դարձվի:
Միքայել Մելքումյանը հիշեցրեց` սահմանամերձ համայնքներին հարկային արտոնություններ են տրվել. «Անցել է 3-4 տարի, բայց նկատելի չեն, արդյոք այդ հարկային արտոնություններից օգտվում են, թե ոչ»: Նա նշեց նաեւ, որ Երեւանում պաշտոնապես կենտրոնացված է փոքր առևտրի 80 տոկոսը, 60% արտադրությունը:
Նելլի ԳՐԻԳՈՐՅԱՆ
