Իտալական այս թեթեւ եւ համեղ, նուրբ սերուցքային աղանդերն այնքան հեշտ է պատրաստելը,որ նույնիսկ ամենաանփորձները կարող են ձեռնարկել: Panna cotta իտալերենից թարգմանած նշանակում է եփված սերուցք:
Անհրաժեշտ մթերքները
Սերուցք` 30-35 տոկոսանոց -500մլ
Շաքարավազ-100 գրամ
Կարդացեք նաև
Ժելյատին-15 գրամ
Վանիլի 1 ձողիկ կամ 1 թեյի գդալ վանիլի մզվածք
Թանձրուկի համար
100 մլ կարմիր գինի
2 ճաշի գդալ ազնվամորու, հաղարջի, հապալասի, մոշի կամ ելակի մուրաբա կամ 0.5 բաժակ շաքարավազ
1 թեյի գդալ կարտոֆիլի կամ եգիպտացորենի օսլա
Ինչպես նաեւ` թարմ հատապտուղ զարդարելու համար
Պատրաստման եղանակը
Նախ սառը ջրով թրջում ենք ժելյատինը: Եթե ունեք շերտերով ժելյատին` ձեր բախտը բերել է, շատ հեշտ կաշխատեք հետը: Եթե փոշի ժելյատին է, լցրեք բաժակի մեջ, վրան կես բաժակ սառը ջուր: Թողեք 10-15 րոպե, ջուրը քամեք:
Եթե չունեք 30-35 տոկոսանոց կաթնասեր, որոնք հիմնականում բավականին թանկ արժեն, ապա գնեք մեկ տուփ հայկական արտադրության 45 %-անոց սերուցք,որը մոտ 200 գրամ է, ավելացրեք վրան 300 մլ թարմ կաթ, լավ խառնեք:
Լցրեք կաթնասերը փոքրիկ կաթսայի մեջ, վանիլի ձողիկը երկայնքով կիսեք, միջից հանեք միջուկը, լցրեք կաթնասերի մեջ, ձողիկն էլ կիսեք եւ գցեք մեջը: Ավելացրեք շաքարավազը, քամած ժելյատինը եւ դրեք կրակին: Փայտե գդալով անընդհատ խառնելով շատ լավ տաքացրեք, որ ողջ ժելյատինը հալվի: Հիշեք, որ կաթնասերը չպիտի եփվի, այլապես ժելյատինը կկորցնի իր հատկությունը:
Լցրեք փոքրիկ ամանների կամ բաժակների մեջ` քամելով: Դրեք սառնարանը` առնվազն 4-5 ժամով: Իմիջիայլոց, հատապտուղները կարող եք միանգամից մեջը լցնել, նոր դնել սառնարան: Կարող եք նաեւ հետո` մատուցելիս զարդարել հատապտուղներով: Լուսանկարներում երկու տարբերակն էլ կա:
Հատապտղային թանձրուկի համար գինին եւ մուրաբան խառնեք իրար, դրեք շատ մարմանդ կրակին: Մեկ թեյի գդալ օսլան լուծեք երկու-երեք ճաշի գդալ սառը ջրի մեջ, ավելացրեք եփվող գինուն, թողեք մի քանի րոպե կրակին, մինչեւ զգաք, որ հեղուկը որոշակիորեն պնդացել է: Անջատեք, թողեք սառչի:
Պաննա կոտան կարող եք մատուցել հենց այն տարայով, որի մեջ պատրաստվել է, կարող եք նաեւ շուռ տալ ափսեի մեջ, շուրջը հատապտուղներ շարել, վրան լցնել հատապտղային թանձրուկը:
Կարող եք մատուցել նաեւ առանց թանձրուկի: Կարող եք պարզապես տրորած հատապտուղ կամ մրգեր ավելացնել: Մի խոսքով` գործի դրեք ձեր երեւակայությունը եւ վստահեք ձեր ճաշակին:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
