Պարզաբանում
Հուլիսի 26-ին, «Լիդիան Արմենիա» ընկերության կողմից տարածվել է տեսանյութ, որում երևում է, թե ինչպես է «Զանգեզուրի պղնձամոլիբդենային կոմբինատ» ՓԲ ընկերության աշխատակիցը՝ գտնվելով Ջերմուկում, ԶՊՄԿ-ի սեփականություն հանդիսացող և իր տնօրինման տակ գտնվող մեքենայի մեջ է դնում մի քանի տոպրակ։
«Լիդիան Արմենիա» ընկերությունը ներկայացնում է կատարվածն իբր «Զանգեզուրի պղնձամոլիբդենային կոմբինատ»-ի կողմից Ամուլսարում փողոց փակող քաղաքացիներին սննդի մատակարարում՝ ակնարկելով քաղաքացիների գործողությունների ուղղորդված լինելը։ Իրողության նման մեկնաբանումը հանդիսանում է բացարձակ զրպարտություն։ Հաշվի առնելով այն հանգամանքը, որ նշված զրպարտությունը տեղ է գտել մի քանի լրատվական կայքերում, հարկ ենք համարում ներկայացնել եղելությունը։
Այսպիսով, ԶՊՄԿ աշխատակից Վահան Գրիգորյանը՝ ծնված 01.05.1984-ին, լինելով արձակուրդում, մեկնել է Ջերմուկ, որտեղ այդ պահին գտնվել է նրա կինը՝ Լուսինե Հովհաննիսյանը՝ ծնված 01.02.1989, որը ծնունդով Ջերմուկից է և ացելելիս է եղել քաղաք Ջերմուկի Շամշյան 11 ա հասցեում բնակվող իր ծնողներին՝ Զավեն և Էմմա Հովհաննիսյաններին։ Վահան Գրիգորյանը Ջերմուկ է մեկնել իր տնօրինման տակ գտնվող՝ ԶՊՄԿ-ի սեփականություն հանդիսացող ավտոմեքենայով։ Գնդեվազ-Ջերմուկ ավտոճանապարհին Վահանը հանդիպել է Լուսինեի եղբորը՝ Գևորգ Հովհաննիսյանին՝ ծնված 01.12.1984-ին, որը նշված տարածքից ոչ հեռու ունի 12 հեկտար ծիրանի այգի։ Գևորգը Վահանին է փոխանցել մի քանի տոպրակ ծիրան, ինչը և ֆիքսվել է «Լիդիան Արմենիա»-ի ներկայացրած տեսանյութում և ստացել խիստ անտրամաբանական մեկնաբանություն ընկերության կողմից։
Հաշվի առնելով այն հանգամանքը, որ «Լիդիան Արմենիա»-ի անպատասխանատու, արհեստածին հայտարարությունը ստվեր է գցում «Զանգեզուրի պղնձամոլիբդենային կոմբինատ»-ի բարի համբավի վրա, խնդրում ենք պատկան մարմիններին մանրամասնորեն քննել այս դեպքը և պատասխանատվության ենթարկել զրպարտող նյութի հեղինակներին։ Մենք պատրաստ ենք տրամադրել դեպքին առնչվող ցանկացած մանրամասներ։
Այս միջադեպը, ցավոք, ցույց է տալիս, որ «Լիդիան Արմենիա» ընկերությունը բացարձակ չի տիրապետում Ջերմուկում ստեղծված իրավիճակին, չի գիտակցում նման անպատասխանատու վարքագծի անխուսափելի հետևանքներն ու դրանց ողջ ծանրությունը։
«Զանգեզուրի պղնձամոլիբդենային կոմբինատ» ՓԲ ընկերություն
