Aravot.am-ը ՀՀՇ վարչության անդամ Հովհաննես Իգիթյանից հետաքրքրվեց՝ հնարավո՞ր է Ռոբերտ Քոչարյանի կարճատեւ կալանավորումը յուրատեսակ քավարան, հնարավորություն դառնա, որ նա համարելով, թե «մաքրվել» է՝ կրկին վերադառնա քաղաքականություն:
«Երեք նախագահներից ամենաբացասական համբավն ունի Ռոբերտ Քոչարյանը, ընդ որում՝ անդառնալի: Արտառոց բան է՝ երեւի հարյուր մարդ չգտնվեց Հայաստանում, որ ի պաշտպանություն Ռոբերտ Քոչարյանի գոնե կանգներ նրա կողքին, որեւէ ԶԼՄ, լրագրող որեւէ ձեւով չի փորձում պաշտպանել նրան:
Ռոբերտ Քոչարյանն ինքը՝ Հայաստան իշխանության գալով ոչ օրինական ձեւով, եւ մարտի մեկով գնալով՝ ստեղծեց այնպիսի վիճակ, որից հետո ինքը երբեք իմ կարծիքով Հայաստանի քաղաքական պետական դաշտում չի կարողանա հայտնվել: Ռոբերտ Քոչարյանն իր ֆինանսական կարողությունները ձեռք է բերել Հայաստանից, Հայաստանին վերաբերվել է որպես փող աշխատելու միջոցի: Այդ տասը տարիների ընթացքում մենք տեսանք, թե ինչ գումարներ է ինքը ծախսում Աֆրիկայից մինչեւ Ռուսաստան: Հետեւաբար, դժվար թե այդպիսի մարդը կարողանա Հայաստանում ձայն հավաքի կամ գործունեություն ծավալի»:
Գոհար ՀԱԿՈԲՅԱՆ
