Մոտ 9 ժամ տեւած դռնփակ նիստից հետո Շենգավիթի դատարանը որոշեց ՀՀ երկրորդ նախագահ Ռոբերտ Քոչարյանին կալանավորել: Այս մասին հայտնեց Ռոբերտ Քոչարյանի պաշտպան Արամ Օրբելյանը: Նա չմեկնաբանեց, թե նախաքննական մարմինը Քոչարյանին կալանավորելու համար ինչ հիմնավորում է ներկայացրել: Փաստաբանը չասաց նաեւ, թե բողոքարկելու են դատարանի որոշումը թե ոչ: Միայն ասաց, որ վաղը հանդես կգան մամուլի ասուլիսով:
Այսօր վաղ առավոտից դատարանը քննում էր Ռոբերտ Քոչարյանին կալանավորելու հարցը: Նրան կալանավորելու միջնորդություն էր ներկայացրել Հատուկ քննչական ծառայությունը՝ ՀՔԾ-ն: ՀՀ Երկրորդ նախագահը մեղադրվում է մարտի 1-ի գործով: Ըստ ՀՔԾ-ի, Ռոբերտ Քոչարյանին մեղադրանքն է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: Մարտի 1-ին 10-ը քաղաքացի սպանվեցին:
Լուսինե ԲՈՒԴԱՂՅԱՆ
