«Սուրբ Գրիգոր Լուսավորիչ» բժշկական կենտրոնի աշխատակազմն այս պահին բողոքի ցույց է անում, ի պաշտպանություն արդեն նախկին տնօրեն Արա Մինասյանի, որը քիչ առաջ ազատվել է աշխատանքից: Մինասյանի ՝ աշխատանքից ազատվելու մասին հայտարարել է առողջապահության նախարար Արսեն Թորոսյանը:
«Սուրբ Գրիգոր Լուսավորիչ ԲԿ ՓԲԸ տնօրենը ազատվել է աշխատանքից՝ հաշվի առնելով ՀՀ ԱՆ ուսումնասիրության արդյունքում հայտնաբերված խախտումների ահռելի ծավալը եւ դրանց մինչ օրս կրկնվող բնույթը։ Նոր տնօրենի մրցույթը տեղի կունենա օրենքով սահմանված կարգով, ինչի մասին լրացուցիչ կտեղեկացնենք»,-ասված է նախարարի հայտարարության մեջ, ինչպես նաեւ մանրամասն ներկայացվել է, թե ինչ բնույթի խախտումներ են արձանագրվել:
Ավելի վաղ տեղեկացրել էինք, որ այս հիվանդանոցում նախարարությունը մի քանի հարյուր միլիոն դրամի խախտումներ եւ չարաշահումներ է հայտնաբերել:
Aravot.am-ի հետ զրույցում հիվանդանոցի մամուլի քարտուղար Քրիստինե Նանյանն ասաց, որ հիվանդանոցի կոլեկտիվն ու այդտեղ բուժծառայություն ստացած քաղաքացիները բողոքի ցույց են անում եւ պահանջում են, որպեսզի նախարարն այցելի հիվանդանոց եւ հանդիպի նրանց հետ. «Մենք պահանջում ենք, որպեսզի Արա Մինասյանը վերականգնվի հիվանդանոցի տնօրենի պաշտոնին: Այստեղ է նախարարության ներկայացուցիչը, բայց մենք պահանջում ենք նախարարը գա»:
Մանրամասները՝ տեսանյութում:
Նելլի ԲԱԲԱՅԱՆ
