Քիչ առաջ Երեւանի ընդհանուր իրավասության դատարանի Շենգավիթի նստավայրում ընդմիջվեց ՀԱՊԿ գլխավոր քարտուղար Յուրի Խաչատուրովի հանդեպ կալանքը որպես խափանման միջոց ընտրելու միջնորդության քննության դատական նիստը, քանի որ Խաչատուրովի պաշտպան Միհրան Պողոսյանը պետք է ծանոթանա առաջադրված մեղադրանքին եւ պաշտպանական մարտավարություն մշակի: Ինչպես լրագրողներին հայտնեց Միհրան Պողոսյանը, նիստը վերսկսվելու է 18:00-ից հետո:
Փաստաբանը նաեւ նշեց, որ այսօր առավոտյան եւս նույն՝ կալանքի հարցով նիստ է հրավիրվել, սակայն Խաչատուրովը ծանուցված չի եղել, այդ պատճառով դատարան չի ներկայացել:
Ինչ վերաբերում է ՀԱՊԿ գլխավոր քարտուղարին առաջադրված մեղադրանքին, այն է՝ մի խումբ անձանց հետ նախնական համաձայնությամբ սահմանադրական կարգի տապալում, փաստաբանը նկատեց, որ քրեական օրենսգրքի այդ հոդվածն ուժի մեջ է մտել 2009թ.-ին, ասել է թե՝ Մարտի մեկի արյունալի իրադարձություններից մեկ տարի անց:
Միհրան Պողոսյանի խոսքով՝ Յուրի Խաչատուրովին մինչ այս պահը չի պարզաբանվել նրան առաջադրված մեղադրանքի հիմքն ու բնույթը, ուստի Խաչատուրովի համար մեղադրանքը պարզ չէ:
Հիշեցնենք, որ Խաչատուրովը Մարտի մեկի դեպքերի ժամանակ զբաղեցրել է Երեւանի կայազորի պետի պաշտոնը, իսկ ապրիլին նշանակվել է ԶՈՒ Գլխավոր շտաբի պետ:
Լուիզա ՍՈՒՔԻԱՍՅԱՆ
