Քիչ առաջ դատավոր Արշակ Վարդանյանի որոշմամբ կալանքից ազատ արձակվեց «Սասնա ծռեր» խմբի անդամներից Մարտիրոս Հակոբյանը՝ ազատամարտիկ «Դեդ»-ը (լուսանկարում՝ առաջին պլանում): Դատարանի որոշման հիմքում այն փաստն էր, որ ըստ դատաբժշկական փորձաքննության արդյունքների՝ ամբաստանյալ Հակոբյանը կալանքի հետ անհամատեղելի առողջական խնդիրներ ունի: Դատարանը Մարտիրոս Հակոբյանի հանդեպ սահմանեց գրավ՝ մեկ միլիոն դրամի չափով:
Այսինքն, երբ դատարանի դեպոզիտ-հաշվին կփոխանցվի այդ գումարը, Հակոբյանը կալանքից կազատվի: Այս պահին նա հիվանդանոցում է՝ բուժում է ստանում, ինչի պատճառով նախորդ դատական նիստերին չէր ներկայանում:
Մարտիրոս Հակոբյանին, ինչպես եւ խմբի անդամների մեծ մասին, առաջադրված են ապօրինի զենք կրելու-պահելու, ռազմավարական նշանակության շենք-շինություններ զավթելու, պատանդ պահելու մեղադրանքներ: Խմբի անդամներից Արմեն Բիլյանը մեղադրվում է մեկ, իսկ Սմբատ Բարսեղյանը՝ երկու ոստիկանի սպանության համար:
https://www.facebook.com/aravot.am/videos/2101523166532854/
Լուիզա ՍՈՒՔԻԱՍՅԱՆ
