ՀՀ ոստիկանությունն օրենսդրական փաթեթի մշակման շրջանակում ներկայումս քննարկում է վարչական տուգանքների չափերը փոխելու հարցը. տուգանքները վերանայվում են: Այս մասին այսօր «ֆեյսբուքյան» հարցուպատասխանի ժամանակ հայտարարեց Երեւանի ՃՈ պետի տեղակալ Արմեն Խաչատրյանը՝ նշելով, որ տեսախցիկների միջոցով արձանագրված տուգանքների չափերը կնվազեն:
«30 հազարը գերազանցող տուգանքներ այլեւս չեն լինի, փոխարենը՝ լրացուցիչ տուգանքներ կկիրառվեն՝ ճանապարհային երթեւեկության կանոնների խախտումների դեպքերը նվազեցնելու նպատակով»,-նշեց Արմեն Խաչատրյանը:
Որոշ օգտատերեր էլ ահազանգեցին, որ մի շարք փողոցներում գծանշումներ չկան, կամ՝ «ջնջվել-մաքրվել» են: Ճանապարհային ոստիկանության պետ Եգոր Կարապետյանը տեղեկացրեց, որ արդեն մեկ ամիս է՝ ոստիկանության կողմից ինտենսիվ գծանշումներ են կատարվում: «Որոշ փողոցներ նորոգման կարիք ունեն, դեռ փոսալցման եւ այլ աշխատանքներ պետք է կատարվեն, այդ պատճառով առայժմ գծանշումներ չեն արվում»,-նշեց ոստիկանության պաշտոնյան:
Լուիզա ՍՈՒՔԻԱՍՅԱՆ
