Միլանի «Սան Դոնատո» մարզասրահում շարունակվում է ծանրամարտի Եվրոպայի մինչեւ 15 եւ 17 տարեկանների առաջնությունը:
Հայաստանի աղջիկների հավաքականի անդամ 15-ամյա Մարգարիտա Առաքելյանը փայլուն հանդես եկավ 75 կգ քաշային կարգում եւ առանց լուրջ խնդիրների նվաճեց իր տարիքային խմբի Եվրոպայի չեմպիոնի կոչումը:
Մարգարիտան պոկում վարժությունում բավական հեշտ բարձրացրեց 69 եւ 72 կիլոգրամները: Երրորդ մոտեցման ժամանակ նա 75 կգ ծանրաձողը նույն հեշտությամբ վերցրեց կրծքին, սակայն կքանիստ վիճակից բարձրանալիս ոտքը սայթաքեց ու քաշը չենթարկվեց նրան: Այդուհանդերձ, Մարգարիտան արժանացավ փոքր ոսկու:
Հրում վարժությունն ընթացավ նույն սցենարով: Նա իրար հետեւից սանձեց 82, 87, 90 կիլոգրամները (կրկին փոքր ոսկի) եւ երկամարտի 162 կգ-ով նվաճեց չեմպիոնի տիտղոսը:
Մարգարիտա Առաքելյանը շատ կարեւոր միավորներ բերեց մեր թիմին, քանի որ Հայաստանի աղջիկների հավաքականը Բուենոս Այրեսի պատանեկան օլիմպիական խաղերի ուղեգիր նվաճելու լուրջ հավակնություն ունի: Դրա համար անհրաժեշտ է թիմային պայքարում տեղ զբաղեցնել լավագույն քառյակում:
Աշոտ ՀԱԿՈԲՅԱՆ
