«Բժիշկ դառնալու համար սպիտակ համազգեստը եւ դիպլոմը բավարար չեն: Ապագա բժիշկները դեռ մեծ ճանապարհ ունեն անցնելու»,-ԵՊԲՀ գիտական խորհրդի հանդիսավոր նիստում այսօր շրջանավարտներին այսպես դիմեց անվանի վիրաբույժ Արտավազդ Սահակյանը, որն իր գործունեության ընթացքում ավելի քան 45 հազար վիրահատություն է կատարել:
Շրջանավարտները Հիպոկրատի երդում տվեցին: «Բժշկի ճանապարհը պահանջում է ազնվություն, տոկունություն եւ նվիրում հիվանդին: Նրան պետք է վերաբերվել այնպես, ինչպես կվերաբերվես հարազատիդ»,-ընդգծեց վիրաբույժը:
Ապա` նա մի ուշագրավ դեպք պատմեց՝ ցանկանալով մատնանշել, թե որքան կարեւոր է հայ բժշկի անունը բարձր պահելը. «Քսանչորս տարի առաջ, երբ ես սկսել էի աշխատել Դնեպրոպետրովսկում, անվանի պրոֆեսորներից մեկը բոլորին ասում էր՝ «կովկասցիները տգետ են, որովհետեւ բժշկի դիպլոմները գնել են մանդարինով»…Այդ ժամանակ ես ասացի, որ Հայաստանում մանդարին չի աճում…Վեց տարի անց նա աղաչում էր ինձ չլքել Ուկրաինան»:
Արտավազդ Սահակյանը շրջանավարտներին եւս մեկ կարեւոր առաքելության մասին հիշեցրեց. «Հայ բժիշկը պետք է ծառայի բանակում»:
Լուիզա ՍՈՒՔԻԱՍՅԱՆ
