Ինչպես ավելի վաղ հայտնել էինք, ՀՀ-ում ԱՄՆ դեսպանատան եւ «Հայաստանի մանուկներ» հիմնադրամի ֆինանսավորմամբ՝ մինչեւ 2021թ.-ը Հայաստանի 15 համայնքներում աշակերտների համար կշարունակվի անգլերենի ուսուցման «Access» ծրագիրը, որով ՀՀ 15 գյուղերի 500 աշակերտներ լիարժեք կտիրապետեն անգլերենին: Ծրագրի համաձայնագրի ստորագրման ժամանակ այսօր դիմելով նախարար Արայիկ Հարությունյանին՝ ՀՀ-ում ԱՄՆ դեսպան Ռիչարդ Միլսն ասաց. «Գիտենք, թե որքան հագեցած է ձեր գրաֆիկը: Սա ցույց է տալիս ձեր եւ նախարարության հանձնառությունը՝ Հայաստանում անգլերենի ուսուցումը ընդլայնելու հարցում: Ծրագիրն իրեն չեր արդարացնի, եթե չլիներ նախարարության աջակցությունը»:
Ռիչարդ Միլսի բնորոշմամբ, այս ծրագրի հերթական փուլը ձգտելու է փակել այն բացը, որն առկա է Հայաստանի գյուղական բնակավայրերում՝ անգլերենի ուսուցման ոլորտում. «Մենք արդեն տեսել ենք արդյունքները: Վերջին երեք տարում ես ՀՀ տարբեր մարզերում հանդիպել եմ ծրագրի շրջանավարտների հետ: Արդյունքներն ապշեցուցիչ են»:
Միլսը պատմեց՝ պատանիները, որոնք նախկինում չեն իմացել անգլերեն կամ շատ քիչ են տիրապետել, երկու տարի անց տիրապետում են միջին եւ միջինից բարձր մակարդակներին. «ՀՀ-ում այս առումով բավականին ընդունակ են: Այլ երկրներում հաճախ չէ, որ նման արդյունքներ ենք ունենում»:
Ապա դեսպանն ընդգծեց, որ ինքն առհասարակ անգլերենի դասավանդման մեծ կողմնակից է. «Սա իմ լեզուն է, որին կուզենայի լավ տիրապետեն: Առհասարակ, ցանկացած օտար լեզվի՝ լինի անգլերեն, ռուսերեն, թե արաբերեն, տիրապետելը կարեւոր է, բայց անգլերեն իմանալը նոր կրթական հնարավորություն է ստեղծում հայերի համար: Նրանք կարող են ուսումը շարունակել ԱՄՆ կրթական հաստատություններում: Անգլերենը բիզնեսի եւ տեխնոլոգիաների լեզու է. դրան տիրապետելը դռներ է բացում դեպի տեխնոլոգիական ոլորտներ»:
Լուիզա ՍՈՒՔԻԱՍՅԱՆ
