ՀՀ-ում ԱՄՆ դեսպանատան, ՀՀ ԿԳ նախարարության եւ «Հայաստանի մանուկներ» հիմնադրամի միջեւ կնքված այսօրվա համաձայնագրով՝ մինչեւ 2021թ.-ը Հայաստանի 15 համայնքներում աշակերտների համար կշարունակվի անգլերենի ուսուցման «Access» ծրագիրը, որն իրականացվում է դեռ 2011թ.-ից: Ծրագրի շնորհիվ արդեն 580 դպրոցական լիարժեք տիրապետում է անգլերենին:
ՀՀ-ում ԱՄՆ դեսպանատանը կայացած միջոցառման ժամանակ ծրագրի նախորդ շրջափուլերի շրջանավարտներից ոմանք շեշտեցին, որ իրենք արդեն ծրագրի ուսուցիչ են հանդիսանում, եւ, ամենակարեւորը՝ դրա շնորհիվ չեն լքել իրենց համայնքները: «Մեր ներկայիս խնդիրներից է՝ ՀՀ հեռավոր համայնքների դպրոցները գրավիչ դարձնել ուսուցիչների համար: Պետք է ոչ թե ստիպել, այլ այնպիսի պայմաններ ստեղծել, որ ուսուցիչները վերադառնան իրենց համայնքներ: Այս ծրագրի դրական փորձը մենք հաշվի կառնենք մեր քննարկումներում»,-հայտարարեց ՀՀ ԿԳ նախարար Արայիկ Հարությունյանը:
Նա նշեց, որ լեզուների ուսուցմանն առհասարակ մեծ կարեւորություն են տալիս. «Աշխարհում այսօր բովանդակությունը ստեղծվում է անգլերենով: Մեր երեխաները պետք է հնարավորություն ունենան հաղորդակցվել այդ բովանդակության հետ: Անգլերենը հաղորդակցման ուղիղ ճանապարհն է»:
Արայիկ Հարությունյանի խոսքով՝ «Access» ծրագրի շարունակականության շնորհիվ ՀՀ մարզերում հնարավոր կլինի կատարելագործել աշակերտների անգլերենի իմացությունը, զարգացնել անգլերենի ուսուցիչների կարողությունները. «Նրանց վերապատրաստումն այս ծրագրի կարեւոր բաղադրիչներից է: Դրանից կշահի կրթությունը: Ծրագիրը նաեւ դպրոցներում հարթակ կստեղծի՝ անգլերենի ուսուցման մեթոդաբանության մշակման համար»:
Լուիզա ՍՈՒՔԻԱՍՅԱՆ
