Ներհայաստանյան վերջին հասարակական-քաղաքական զարգացումներից հետո ԱՄՆ ներդրողների շրջանում մեծ հետաքրքրություն կա Հայաստանում ներդրումներ անելու հանդեպ: Այս մասին այսօր լրագրողների հետ զրույցում ասաց ՀՀ-ում ԱՄՆ դեսպան Ռիչարդ Միլսը: «Հիմա կարեւոր է, որ ՀՀ կառավարության ջանքերն ուղղված լինեն ներդրումային միջավայրի գրավչության ապահովմանը: Դա կարեւոր է ոչ միայն ամերիկացի, այլեւ առհասարակ՝ օտարերկրացի ներդրողների համար»,-ընդգծեց դեսպանը:
Նրա խոսքով՝ ամերիկացի ներդրողները հետեւում են Հայաստանում տեղի ունեցող փոփոխություններին. «Նրանք ողջունում են դրանք, հետեւում իրավապահների քննությունների ընթացքին, հարկերից խուսափելու դեպքերին, կոռուպցիոն բացահայտումներին: Նրանք ողջունում են կոռուպցիայի դեմ պայքարի գործողությունները, բայց կարեւոր է, որ այդ ամենն իրականացվի իրավունքի ուժով: Նրանք ուզում են վստահ լինել, որ բարեխիղճ ներդրողները չեն տուժի հակակոռուպցիոն այդ գործողությունների արդյունքում: Նրանք հետեւում են, որպեսզի համոզվեն՝ արդյոք այդ ամենը կատարվում է օրենքի գերակայության պայմաններում»:
Դեսպան Միլսն անդրադարձավ նաեւ այլ ոլորտներում ՀՀ-ԱՄՆ կապերի հնարավոր խորացմանը: «Վերջերս Բրյուսելում էր ՀՀ պաշտպանության նախարարը, որը հանդիպել է ԱՄՆ ռազմական գերատեսչության բարձրաստիճան ղեկավարների հետ: Քննարկվում է այդ ոլորտում մեր գործընկերությունը խորացնելու հնարավորությունը: ԱՄՆ-ի եւ Հայաստանի համար կարեւոր է նաեւ առեւտրատնտեսական հարաբերությունների խորացումն ու ընդլայնումը»,-եզրափակեց ՀՀ-ում ԱՄՆ դեսպանը:
Լուիզա ՍՈՒՔԻԱՍՅԱՆ
«բարեխիղճ» ներդրողներ… նորէն Disneyland գացինք…
բիզնեսի մասին ենք խօսում… այդ ալ, տակաւին տնտեսապէս ենթա-զարգացած երկրի մը մէջ…
մեծ ներդրողների մեծամասնութիւնը կը նախընտրեն պաշտօնեաներու «նուէրներ» ընել, քան թէ լիովին ենթարկուիլ օրինական բոլոր պայմաններին, լրիւ հարկեր վճարել, եւայլն.
ինչեւէ… բարի զուարճացում, դեռ մի քիչ եւս… վերջապէս, արեւոտ արձակուրդների ժամանակաշրջան է… բարեւ ըրէք Mickey Mouse-ին…