Եվրոպայի չեմպիոնին ու մեդալակիրներին պարգեւատրեց Փաշիկ Ալավերդյանը:
Միլանում ընթացող ծանրամարտի Եվրոպայի մինչեւ 15 եւ 17 տարեկանների առաջնությունում կրտսեր պատանիների պայքարին մասնակցող 77 կգ քաշային Գրիգոր Հարությունյանը երկրորդ ոսկե մեդալը նվաճեց Հայաստանի համար: Նա մեկ գլխով բարձր էր մրցակիցներից եւ ըստ էության պայքարում էր ինքն իր հետ:
Պոկում վարժության առաջին մոտեցումը 111 կգ ծանրաձողին նա սկսեց այն ժամանակ, երբ ուժեղագույն խմբի ութ մասնակիցներն արդեն ավարտել էին պայքարը, եւ առաջին իսկ մոտեցումով իր համար ապահովեց փոքր ոսկին: Այնուհետեւ Հարությունը սանձեց նաեւ 117 կիլոգրամը, իսկ վերջին մոտեցմանը 121 կգ-ն չենթարկվեց նրա կամքին:
Հրում վարժության առաջին իսկ մոտեցումից հետո (130 կգ), արդեն պարզ դարձավ, որ Հարությունը անհասանելի է: Սակայն նա այնուհետեւ հաջորդաբար բարձրացրեց 136 եւ 141 կիլոգրամները (նույնպես փոքր ոսկի) եւ երկամարտի 258 կիլոգրամով նվաճեց չեմպիոնի տիտղոսը`12 կիլոգրամով գերազանցելով մերձակա մրցակցին:
Չեմպիոնին եւ մեդալակիրներին պարգեւատրեց Հայաստանի ծանրամարտի ֆեդերացիայի գլխավոր քարտուղար Փաշիկ Ալավերդյանը:
Աշոտ ՀԱԿՈԲՅԱՆ
