Պետական վերահսկողական ծառայության ուսումնասիրությունների հիման վրա 1.2 միլիոն դոլարի չարաշահումներ են բացահայտվել: Այս մասին ֆեյսբուքյան իր էջում ուղիղ եթերով հայտարարել է ծառայության պետ Դավիթ Սանասարյանը: Նրա խոսքով՝ «արդեն մեկ գործով դիմել են դատախազություն, առաջիկայում եւս այլ գործերով են դիմելու: Չեմ ուզում շտապել մանրամասներ ներկայացնել: Վստահեցնում եմ՝ ապշելու եք, երբ առաջիկայում ներկայացնեմ, թե ինչեր են տեղի ունեցել, եւ տեսնելու եք, թե նախկին իշխանություններն ինչպես են վերաբերվել պետությանը»:
Սանասարյանը վստահեցրել է՝ ուսումնասիրություններ են կատարել ՀՀ ոստիկանական համակարգում: Ըստ Սանասարյանի. «Բացահայտել ենք, որ կան արտոնյալներ՝ նախկին գեներալներ, ոստիկանապետեր ու փոխոստիկաններ իրար պետհամարանիշներ են նվիրել, հիմա պաշտոնավարումից հետո էլ այս մարդիկ խախտումներ են անում, տեսախցիկները նկարահանում են, բայց նրանք տուգանքներ չեն վճարում»:
Բացի այս, Սանասարյանը նաեւ հայտարարել է, որ երեկ սկսել են ուսումնասիրություն ոստիկանության ենթակա «Լուսանշան» ՊՈԱԿ-ում, որը պետական բյուջեից եւ արտաբյուջեից 3.4 միլիարդ դրամի ֆինանսավորում է ստացել: Այս ՊՈԱԿ-ն, ինչպես ներկայացրեց Սանասարյանը, զբաղվում է լուսացույցերի տեխնիկական սպասարկմամբ, ճանապարհային գծանշումներով. «Այս կառույցը 2014-ից 2017 թվականը տարեկան 800 միլիոն դրամի ֆինանսավորում է ստացել: 2018-ի առաջին կիսամյակում՝ 238 միլիոն: Ընդհանուր՝ 3.4 միլիարդ դրամի ֆինանսավորում պետական բյուջեից եւ արտաբյուջեից: Ունենք տեղեկություններ, թե ինչեր են տեղի ունեցել այս ՊՈԱԿ-ում: Հնարավորինս արագ հասկանալու ենք, թե՝ ինչ է կատարվել այստեղ, ու փորձում ենք լուծարել այն»:
Այս առնչությամբ Aravot.am-ը պարզաբանում խնդրեց ՀՀ ոստիկանությունից, որտեղից մեզ վստահեցրին, որ առաջիկայում կպատասխանեն մեր հարցերին:
Սանասարյանը նաեւ հայտարարել է, որ «Հայրենիք-Սփյուռք» ՊՈԱԿ-ում ուսումնասիրությունից պարզվել է, որ այստեղ 200-250 միլիոն դրամի խախտում է տեղի ունեցել. «Դատախազությունը կբացահայտի, թե՝ որ չափն է յուրացում, եւ որ չափն անարդյունավետ ծախս»:
Նելլի ԲԱԲԱՅԱՆ
