«Իմ քայլը» ժողովրդական շարժման օրերին՝ բազմամարդ երթերի եւ բողոքի գործողությունների ժամանակ գրանցվել է լրագրողների հանդեպ ֆիզիկական բռնությունների 18 եւ տարատեսակ այլ ճնշումների 8 դեպք: Այս մասին այսօր «Հենարան» մամուլի ակումբում լրագրողների հետ հանդիպմանը հայտնեց «Խոսքի ազատության պաշտպանության կոմիտեի» ղեկավար Աշոտ Մելիքյանը: «Նկատելի էր, որ այդ բռնությունները գրեթե դադարեցին Սերժ Սարգսյանի հրաժարականի օրը, երբ ոստիկանությունն այլեւս չէր հակազդում ցուցարարների եւ լրագրողների գործունեությանը: Հիմնական խախտումները եղել են ապրիլի 11-ից 23-ը»,-արձանագրեց նա:
Աշոտ Մելիքյանի խոսքով՝ ԽԱՊԿ զեկույցում նշված է, որ հարձակումները լրագրողների հանդեպ թիրախավորված են եղել՝ ոստիկանների եւ նրանց հովանու ներքո գտնվող քաղաքացիական անձանց կողմից. «Ոստիկանությունը խախտել է իր լիազորությունները: Այդ ժամանակահատվածում դատախազությունը եւ մյուս իրավապահ մարմիններն ակտիվ փորձել են հայտնաբերել մեղավորներին, բայց այսօր, ցավոք, ամենաթարմ տվյալներով՝ 11 քրեական գործ է միայն հարուցվել, մինչդեռ բռնության դեպքերը 26-ն են»:
Աշոտ Մելիքյանը հայտնեց, որ 5 դեպքում է միայն մեղադրանք ներկայացվել. «Երեք դեպքում էլ գործը դատարանում է: Մեկ դատավճիռ ունենք միայն, ուստի արդյունավետությունը շատ ցածր է: Իրավապահների գործողությունները համարժեք չեն բռնությունների ծավալին»:
https://www.facebook.com/aravot.am/videos/2095964523755385/
Լուիզա ՍՈՒՔԻԱՍՅԱՆ
