Էջմիածնի ավագանու նիստն այսօր սկսվեց Հայաստանի հիմնով: Առաջարկը քաղաքապետինն էր: Հայաստանի հիմնից հետո, հնչեց Էջմիածնի հիմնը:
Քննարկվող հարցերից մեկն էլ Մանվել Գրիգորյանին Էջմիածնի պատվավոր քաղաքացու կոչումից զրկելու հարցն է։ Քաղաքապետի ժամանակավոր պաշտոնակատար Դիանա Գասպարյանն այդ առնչությամբ հարցում է արել իր ֆեյսբուքյան էջում`ճշտելու տրամադրությունները: Ֆեյսբուքյան մեկնաբանություններում եղել են նաեւ անմեղության կանխավարկածը չխախտելու հորդորներ: Նաեւ գրառումներ, որ Էջմիածինն ավելի կարեւոր հոգսեր ունի, դրանք պետք է լուծել:
Հարցը ավագանու նիստում զեկուցեց քաղաքապետի պաշտոնակատարը: Նա համաձայն չէ անմեղության կանխավարկածի հետ, ասում է`դա իրավական հետեւանքներ չի առաջացնում: Կարծում է`հարցը բարոյական հարթությունում է: Բայց ինքը կողմ է, որ Մանվել Գրիգորյանը զրկվի Էջմիածնի պատվավոր քաղաքացու կոչումից, քանի որ ԱԱԾ-ի`նրա տանը կատարված բացահայտումներից հետո, այլ քաղաքներ շատ արագ դա արեցին:
Այլ մանրամասները` տեսանյութում
Հարցը չքննարկվեց: Ավագանիներից միայն մեկը`Հրաչյա Ավետիսյանը կարծիք հայտնեց: Ասաց`պետք է զրկել, միանշանակ. «Ոչ իմ ոչ ձեր, ոչ մյուսների տանից չեն հայտնաբերել, այն՝ ինչ հայտնաբերել են: Զինվորի հացը հայտնաբերել են այն տեղից, որտեղ ինքն էր ապրում»:
Այլ մանրամասները` տեսանյութում
Քննարկվեց նաեւ քաղաքի բյուջեի առաջին կիսամյակի կատարողականը: Բյուջեն թերակատարվել է`քաղաքական իրավիճակն է պատճառը: Քաղաքապետի պաշտոնակատար Դիանա Գասպարյանն ասում է`հանրության մոտ թյուր կարծիք կա, որ այլեւս որեւէ հարկ եւ տուրք չեն վճարելու: Համենայնդեպս, հարկերի գանձումներ կատարող քաղաքապետարանի աշխատակիցներին բնակիչները վիրավորում եւ կոպտում են, թե իրավիճակ է փոխվել, իրենք հարկ չեն վճարելու: Քաղաքապետի պաշտոնակատարը հորդորում է`եթե ավելի լավ երկիր ենք ուզում կառուցել, բոլորն իրենց պարտավորությունները պետք է պատշաճ կատարեն:
Ավագանին քննարկում է նաեւ ուժը կորցրած ճանաչելու մասին իր մի որոշումը, որով «Պատանի երկրապահ» ակումբին ամսական 150 հազարական դրամ են փոխանցել:
Նելլի ԳՐԻԳՈՐՅԱՆ
