ՀՀ վարչապետ Նիկոլ Փաշինյանի եւ նրա ղեկավարած կառավարությունում կադրային նշանակումներին քննադատաբար է մոտենում ԱԻՄ առաջնորդ Պարույր Հայրիկյանը: «Ինձ համար անհասկանալի է մեծերին չպատվելն ու «երեխաներին» գայթակղելը: Դրանք ծանր մեղքեր են»,-«Հայելի» մամուլի ակումբում այսօր լրագրողների հետ հանդիպմանն ասաց Պարույր Հայրիկյանը:
«Այդ կառավարությունում չգիտե՞ն Հրանտ Բագրատյանի տեղը: Քանի՞ անգամ նա ասեց, որ պատրաստ է օգնել, խորհուրդ տալ: Արտաքին քաղաքական հարցերում երբեւէ լսե՞լ եք, որ Րաֆֆի Հովհաննիսյանի կամ Արա Պապյանի կարծիքը հարցնեն: Կամ, Հակոբ Սանասարյանի ու Կարինե Դանիելյանի կարծիքը հարցրե՞լ են, երբ բնապահպանական խնդիրներ են քննարկել: Հանրահայտ մասնագետներ ունենք, որոնց ուշադրություն չեն դարձնում: Սա նշանակում է մեծերին չպատվել»-դժգոհեց Պարույր Հայրիկյանը:
Ապա նա անդրադարձավ իր կուսակից Գագիկ Սարուխանյանի այսօրվա ասածին, թե «Իմ քայլը» ժողովրդական շարժման օրերին «Քաղաքացիական պայմանագրի» ներկայացուցիչները այլ ուժերի առաջնորդների, այդ թվում՝ իրեն, թույլ չեն տվել ելույթ ունենալ Հանրապետության հրապարակի հարթակից: Հայրիկյանը նախ նշեց՝ ինքն այնպիսի քաղաքական անցյալ ունի, որ որեւէ մեկից չի էլ խնդրի ելույթ ունենալ, ուստի նման բան չի եղել:
Պարզապես մի դեպք է եղել, երբ ինքն առաջարկել է սահմանադրության փոփոխության ճանապարհ, քանի որ Սերժ Սարգսյանի «համար» գրված սահմանադրությամբ հեղափոխությունն անելն անընդունելի էր: Հայրիկյանի բնորոշմամբ, ինքը կարող էր սահմանադրության փոփոխության իրավական լծակների մասին հանրությանն իրազեկել հարթակից, բայց Նիկոլ Փաշինյանն ու իր կողմնակիցները չեն ընդունել ԱԻՄ-ի առաջարկը:
Լուիզա ՍՈՒՔԻԱՍՅԱՆ
Մարդու ոտնահարված իրավունքի պաշտպան..