Քաղաքագետ Ալեքսանդր Իսկանդարյանը կարծում է, որ ներկայիս իշխանության համար ապագայում նոր խորհրդարանում մեծամասնություն լինելու հարցում խոչընդոտներ չեն լինի, իսկ մյուս քաղաքական ուժերից «Ծառուկյան» դաշինքը, վստահաբար, եւս կլինի նոր ԱԺ-ում: «Ինչ վերաբերում է քաղաքապետի ընտրություններին, չեմ հավատում, որ «Երկիր ծիրանին» «Ելք»-ից ավելի ձայներ կհավաքի: ՀՀԿ խմբակցությունն էլ փաստացի կա, իսկ ահա կուսակցությունը՝ ոչ»,-«Հայելի» մամուլի ակումբում այսօր լրագրողների հետ հանդիպմանն ասաց քաղաքագետը:
Լրագրողները հետաքրքրվեցին, թե իր դիտարկմամբ՝ «Ելքը»-ի մասը կազմող կուսակցություններն առանձի՞ն կմասնակցեն ԱԺ ընտրություններին: «Հասկանալի է, որ «Ելք»-ը երբեք միասնական գաղափարներով հանդես չի եկել: Դա իրավիճակային դաշինք էր, որը ստեղծվեց՝ ԱԺ անցնելու համար, ինչը եւ հաջողվեց»,-նկատեց Ալեքսանդր Իսկանդարյանը:
Նրա խոսքով՝ ներկայիս իշխանությանը՝ «Քաղաքացիական պայմանագիրը» կորոշի, թե իր հետ որ ուժին «կտանի» ԱԺ. «Իրենից բացի, հաստատ պետք է այլ ուժի տանել»:
Ինչ վերաբերում է հարցին, թե ԱԺ ընտրություններն, ի վերջո, երբ կանցկացվեն, Ալեքսանդր Իսկանդարյաննն ընդգծեց. «Ֆրանկոֆոնիան ընդունել առանց Փաշինյանի՝ անհարմար է: Դա լուրջ իրադարձություն է: Հետեւաբար, մինչ այդ Փաշինյանը պետք է մնա վարչապետ: Հետո պետք է ընտրություններ լինեն: Ստացվում է, որ Նոր տարվա նախաշեմին ընտրություններ անելը հարմար չէ: Հետեւաբար, ընտրությունները կկազմակերպվեն դրանից հետո»:
Հիշեցնենք, որ հոկտեմբերին Հայաստանը կհյուրընկալի Ֆրանկոֆոնիայի միջազգային գագաթնաժողովը:
Լուիզա ՍՈՒՔԻԱՍՅԱՆ
