Քաղաքագետ Ալեքսանդր Իսկանդարյանը կարծում է, որ վերջերս ՀՀ-ում ռուսական ռազմակայանի կողմից Փանիկ գյուղում գրանցված միջադեպի առնչությամբ մտահոգվել պետք չէ: «Ոչինչ էլ չի պատահի, Ռուսաստանի հետ գործակցությունը նույն մակարդակի վրա կլինի, շփումները կշարունակվեն: Անվտանգության ոլորտում հայ-ռուսական գործակցությունը աշխարհաքաղաքական պատճառներ ունի, ուստի այդ հարցում այս միջադեպի հետ կապված լուրջ փոփոխություններ չեն լինի»,-«Հայելի» մամուլի ակումբում լրագրողների հետ հանդիպմանն այսօր ասաց Իսկանդարյանը:
Նրա բնորոշմամբ՝ այդ իրադարձությունն իր նշանակությամբ փոքր է. «Նման դեպքեր եղել են եւ առաջիկայում էլ չեն բացառվում»:
Լրագրողները հետաքրքրվեցին՝ եթե այդ դեպքը փոքր է, ապա ինչո՞ւ վարչապետ Նիկոլ Փաշինյանն այն «սադրանք» որակեց: Քաղաքագետն ի պատասխան նկատեց. «Կարող են առաջանալ որոշակի սկանդալներ, որոնք փորձության են ենթարկում հայ-ռուսական հարաբերությունները: Այդ տեսանկյունից համաձայն եմ վարչապետի հետ: Միաժամանակ, հայ-ռուսական հարաբերությունները սովոր են նման միջադեպերի, դրանք ավելի մեծ հարվածների էլ են ենթարկվել, օրինակ՝ Պերմյակովի դեպքը, ապրիլյան ռազմական սրացումները»:
Ալեքսանդր Իսկանդարյանն այնուհետեւ հարցադրում արեց. «Ինչո՞ւ պետք է «սադրանք» բառի հետեւում որեւէ մեկը կանգնած լինի. «Այլ է հարցը, որ հանրությունը եւ լրատվամիջոցները կտրուկ են արձագանքում նման միջադեպերին»:
Քաղաքագետի համոզմամբ՝ չնայած պաշտպանության նախարար Դավիթ Տոնոյանի հայտարարությանը, ՀՀ-ում ռուսական ռազմակայանի կարգավիճակի փոփոխություն չի լինի. «Կողմերի միջեւ գործակցությունը կշարունակվի, զինտեխնիկայի մատակարարման շուրջ բանակցությունները՝ եւս»:
Լուիզա ՍՈՒՔԻԱՍՅԱՆ
