«Ավելի շատ հակված եմ տեսակետին, որ ռուսներն ուղղակի իրենց ոճին համաձայն՝ իրենց գործն են արել՝ առանց որեւէ մեկին նախազգուշացնելու»,-«Հայելի» մամուլի ակումբում այսօր լրագրողների հետ հանդիպմանն անդրադառնալով ՀՀ-ում ռուսական ռազմակայանի կողմից Փանիկ գյուղում գրանցված միջադեպին, ասաց քաղտեխնոլոգ Կարեն Քոչարյանը: Նրա խոսքով՝ ճիշտ է սահմանափակվել այն փաստով, որ ռազմակայանի ղեկավարությունը ներողություն է խնդրել կատարվածի համար. «Հիմա ճիշտ չէ հայ-ռուսական կամ հայ-իրանական հարաբերություններում որեւէ պատմություն սարքել: Դա ավելի շատ փնթիության հետեւանք է եղել: Դա աշխատաոճ է, որը չի փոխվում: Զգոնությունը բթացել է»:
Կարեն Քոչարյանի գնահատմամբ՝ Փանիկում կատարվածում քաղաքական ենթատեքստ չկա. «Չեմ ասում, թե հայ-ռուսական հարաբերություններում ամեն ինչ լավ է, բայց այն, ինչ գրվում էր ռուսական մամուլում մինչեւ Փաշինյանի Մոսկվա այցը, եւ դրանից հետո, տարբեր են: Այցից հետո նույն մամուլում դադարեցին բացասական գնահատականները: Փոխարենը, դրանք ակտիվացել են վերջին շրջանում, բայց այստեղ Փաշինյան-արեւմտամետություն խնդիրը չէ»:
Ինչ վերաբերում է Ռուսաստանի եւ Արեւմուտքի՝ Արցախյան հակամարտության բանակցային գործընթացում ազդեցությանը, Կարեն Քոչարյանը նշեց. «Ենթադրվում է, որ բանակցությունները կակտիվանան: ԵԱՀԿ Մինսկի խումբը «ռեսթարթ» պետք է անի, որովհետեւ նոր խաղացող կա՝ ի դեմս Նիկոլ Փաշինյանի»:
https://www.facebook.com/aravot.am/videos/2094035740614930/
Լուիզա ՍՈՒՔԻԱՍՅԱՆ
