Երեւանի գլխավոր պողոտայի՝ Սարյան փողոց-Մաշտոցի պողոտա միջանկյալ հատվածում, հանրությանն ավելի շատ հայտնի «Մալիբու» սրճարանին հարակից այգու բարեկարգման աշխատանքների ավարտը կրկին հետաձգվում է: Այգին որպես հանգստի գոտի բարեկարգում է «Նոր Երեւան» ՍՊԸ-ն, որը «Տաշիր գրուպի» ընկերություններից է: 2015-ին, երբ հայտարարվեց այս այգու բարեկարգման մասին, աշխատանքների ավարտ էր նշվել 2017 թվականի ապրիլի 30-ը։ Հետո այս ժամկետը հետաձգվեց, եւ ըստ կառուցապատողի՝ շինաշխատանքները պետք է ավարտվեն մի քանի օրից՝ այս տարվա հուլիսի 25-ին:
Սակայն շինարարներն ասում են, որ չեն հասցնում ավարտել նշված ժամկետում, որոշ աշխատանքներ դեռ կան անելու: Նրանց ներկայացմամբ՝ այգուն հարող երկու գետնանցումներն էլ փակվել են այս շինարարությանը զուգահեռ, դրանք էլ պետք է վերանորոգվեն, որպեսզի հանգստի գոտու բարեկարգումը ավարտուն լինի: Մինչդեռ գետնանցումի շինաշխատանքների ավարտը չի էլ նշմարվում:
Երեւանի քաղաքապետարանը վստահեցրել էր, որ այգու բարեկարգման նախագծի համաձայն՝ պետք է կառուցվեր ամֆիթատրոն, նորովի լուծումներով պետք է վերականգնվեն շատրվանները, շուրջ 2500 քմ-ով ավելացվեն կանաչ տարածքները։ Շինարարության ընթացքում կառուցապատողը մտքափոխվել է. այստեղ սրճարաններ են լինելու, կանաչ տարածքներ՝ եւս:
Լուսանկարները՝ ՆԵԼԼԻ ԲԱԲԱՅԱՆԻ
«Առավոտ»
20.07.2018
