Ֆրանսիան կշարունակի նպաստել Լեռնային Ղարաբաղի հակամարտության կարգավորմանը՝ ի շահ տարածաշրջանի ժողովուրդների: Այս մասին ասվում է Ելիսեյան պալատի տարածած հաղորդագրության մեջ, որում ամփոփվել են Փարիզում Ֆրանսիայի և Ադրբեջանի նախագահներ Էմանուել Մակրոնի և Իլհամ Ալիևի հանդիպումը:
«Երկու երկրների նախագահները կարծիքներ են փոխանակել Լեռնային Ղարաբաղի հակամարտության վերաբերյալ: Ֆրանսիան՝ որպես ԵԱՀԿ Մինսկի խմբի համանախագահ, առանձնահատուկ պատասխանատվություն է կրում՝ տարածաշրջանում ապահովելու երկարաժամկետ խաղաղություն»,- ասվում է հաղորդագրության մեջ:
Ֆրանսիայի նախագահը է նշել է, որ կշարունակի լուծման ուղիներ որոնել՝ հիմնված բանակցությունները վրա, և ընդգծել, որ բանակցությունները հակամարտության լուծման և տարածաշրջանում կայուն խաղաղություն հաստատելու միակ ուղին են:
Հաղորդագրության մեջ նաև նշվում է, որ Մակրոնը ողջունել է Հայաստանի և Ադրբեջանի արտգործնախարարների՝ Բրյուսելում հուլիսի 11-ին տեղի ունեցած հանդիպումը: «Ֆրանսիայի նախագահն ուշիուշով կհետևի իրավիճակին, և Ֆրանսիան Ռուսաստանի և ԱՄՆ-ի համանախագահների հետ կձեռնարկի բոլոր քայլերը՝ կարգավորման գործընթացում հաջողության հասնելու համար»,- ասվում է հաղորդագրության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
