«Չեմ կարծում, թե այդ միջադեպի վերաբերյալ վարչապետի գնահատականը չափից շատ կոշտ էր: Փանիկ գյուղում կատարվածը խայտառակություն էր: Այո, մենք ունենք ռուսական ռազմաբազա, կան փաստաթղթեր, բայց ռազմաբազան պարտավորություն ունի ցանկացած զորավարժությունից առաջ նախազգուշացնել դրա մասին եւ դա խաղաղ բնակչությունից հեռու անել»,-լրագրողների հետ զրույցում այսօր, անդրադառնալով այն փաստին, որ օրերս Փանիկ գյուղում կատարված միջադեպը վարչապետ Նիկոլ Փաշինյանը «սադրանք» է որակել, ասաց «Ելք» խմբակցության պատգամավոր Էդմոն Մարուքյանը:
«Անհասկանալի է, թե ինչպես է այդ զորավարժության անցկացումը թույլատրվել: Հետեւաբար, վարչապետի գնահատականը հստակ էր: Պետք չէ կատարվածը մեծ խնդիր դարձնել, բայց կարծում եմ՝ մեղավորները պատասխանատվության կենթարկվեն»,-հավելեց նա: Պատգամավորը շեշտեց. «Այո, ռուսական զորք կա, զենք կա, բայց ամեն ինչ օրենքով պետք է լինի»:
Լուիզա ՍՈՒՔԻԱՍՅԱՆ
