«Մենք հստակ հայտարարել ենք, որ ՀՀ արտաքին քաղաքականության մեջ շրջադարձեր չեն լինելու: Մենք չենք մասնակցել որեւէ ֆորմատի հանդիպման, որ շրջադարձ է մեր երկրի համար»,- այսօր կառավարությունում կայացած մամուլի ասուլիսում, պատասխանելով հարցին`ռուսական կողմից «սադրանք» է որակվում ՀՀ-ի մասնակցությունը ՆԱՏՕ-ի գագաթաժողովներին եւ զորավարժություններին, որ լինելով ՀԱՊԿ անդամ, Ռուսաստանի ռազմավարական գործընկեր, Հայաստանը սերտացնում է հարաբերությունները ՆԱՏՕ-ի, ընդհանրապես, Արևմուտքի հետ, ասաց Նիկոլ Փաշինյանը:
Վարչապետը հստակեցրեց`ինքը Բրյուսելում մասնակցել է ոչ թե ՆԱՏՕ-ի գագաթաժողովին, այլ Աֆղանստանում խաղաղապահ գործունեություն իրականացնող երկրների գագաթաժողովին: ՀՀ-ն այդ երկրների շարքում է:
Նիկոլ Փաշինյանը հիշեցնում է`ՀՀ-ն ԵՄ-ի, ՆԱՏՕ-ի հետ համագործակցություններ ուներ մինչ հեղափոխությունը. «Մենք ասել ենք, որ մեր միջազգային պարտավորությունները կատարել ենք և կատարում ենք»:
Ճշտող հարցին՝ ՀՀ-ն մասնակցելո՞ւ է օգոստոսի 1-ին Վրաստանում կայանալիք ՆԱՏՕ-ի Noble Partner 2018 զորավարժությանը, վարչապետը պատասխանեց. «Իմ սեղանին նման որոշում կայացնելու հարց չի դրվել. կքննարկենք, որոշում կկայացնենք»:
Նելլի ԳՐԻԳՈՐՅԱՆ
