Հեղափոխությամբ իշխանության եկած Նիկոլ Փաշինյանի կառավարության առջեւ դրված է թոշակների եւ աշխատավարձերի բարձրացման խնդիրը: Այս մասին, այսօր կառավարությունում կայացած մամուլի ասուլիսում հայտարարեց վարչապետը: Ասում է` կոռուպցիայի, ստվերի դեմ պայքարում իրենց նպատակը բանտերը լցնելը չէ, այլ ապահովել հավասար տնտեսական դաշտ, ժողովրդին հասանելի գումարները գանձել, ավելացնել պետական եկամուտները, որոնք պետք է ծախսվեն պետական նպատակների համար՝ թոշակներ, աշխատավարձ, անվտանգության հարցեր եւ այլն. «Ամեն օր կոռուպցիոն բնույթի բացահայտումներ են լինում, եւ գումարներ են վերադարձվում»: Վարչապետը նաեւ ասում է, որ այս գործընթացի արդյունքում պետք է հասնենք մի փուլի, երբ պետական պարտքը, որը հասել է վերին սահմանին, այլեւս չպետք է ավելացնենք:
«Ես իմ ամենասուր ընդդիմադիր ելույթներում ինձ թույլ չեմ տվել մտածել, որ երկրում կարող է վիճակն այնպիսին լինել, ինչպիսին այսօր է, որ թալանի մակարդակը կարող է լինել մեր երեւակայության սահմանից անդին»,- հայտարարեց Նիկոլ Փաշինյանը:
Ասում է` կոռուպցիայի դեմ պայքարն այնպիսի ծավալներ է ստացել, որ գնալով ավելի ու ավելի մեծ թվով մարդկանց է սկսել ընդգրկել, նույնիսկ այնպիսի մարդկանց, որոնք ծափահարել են հեղափոխությանը. «Երբ ես ասել եմ, որ կոռուպցիայի դեմ պայքարը կանգ չի առնելու նույնիսկ իմ ընտանիքի անդամի դեպքում, ես կատակ չեմ արել: Ես ասել եմ ամենայն լրջությամբ: Առավել եւս մյուսները պետք է հասկանան, կոռուպցիայի դեմ պայքարը որեւէ մեկին հանդիպելիս կանգ չի առնելու»:
Նելլի ԳՐԻԳՈՐՅԱՆ
