Խորհրդարանում այսօր ընտրական օրենսգրքի փոփոխությունների շուրջ քննարկման ժամանակ բանավիճեցին այդ նպատակով ստեղծված աշխատանքային խմբի «Ելք» խմբակցության ներկայացուցիչ Էդմոն Մարուքյանն ու ՀՀԿ ներկայացուցիչ Դավիթ Հարությունյանը: Էդմոն Մարուքյանը, անդրադառնալով առաջիկայում սպասվելիք արտահերթ խորհրդարանական ընտրություններում տեղամասերում տեսախցիկների տեղադրման խնդրին, ասաց. «Դրա բեռը կրում է ներկայիս իշխանությունը: Ասում ենք՝ գումար չկա, բայց մեզ ասում են՝ իշխանություն եք, ճարեք»: Ըստ Մարուքյանի, ՀՀԿ-ն է նման շեշտադրումով մոտենում հարցին: «Դեմ եմ, որ տեսախցիկները նախորդ ընտրություններից հետո կառավարության ենթակա մարմիններին են բաշխվել, այդ թվում՝ ԱԺ-ին»,-նշեց Մարուքյանը, ապա դիմեց Հարությունյանին,-«Ձեր կառավարությունն է բաշխել, մինչդեռ ԵՄ դրամաշնորհի շրջանակներում իրավունք չունեինք բաշխել»:
Դավիթ Հարությունյանը չհամաձայնեց. «Հիմա ասեմ, թե ինչի իրավունք ունեինք: Այդ գույքը համարվում է ՀՀ սեփականությունը, եւ եթե այն տրվում է ԱԺ-ին, ՊՆ-ին կամ Կառավարությանը, սեփականությունը չի դադարում սեփականություն լինելուց»: Էդմոն Մարուքյանը չհամաձայնեց. «Գույքի օգտագործման նպատակը եղել է ընտրական տեղամասերում սարքերի տեղադրումը, բայց դուք դրանք տվել եք այլ մարմինների, որոնք չունեն ընտրական գործառույթ: Հիմա էլ ասում եք, թե նոր կառավարությունը որտեղից ուզում է՝ թող գտնի-բերի»:
Դավիթ Հարությունյանը Մարուքյանին առաջարկեց գրավոր հարցում հղել Եվրամիությանը եւ համոզվել, որ տեսախցիկները պետական մարմիններին բաշխելու իրավունք ունեցել են: Էդմոն Մարուքյանն էլ կրկին հակադարձեց. «Ճշտել եմ, որ դրամաշնորհի շրջանակում նման իրավունք չեք ունեցել»: Դավիթ Հարությունյանն, այնուամենայնիվ, կրկին հորդորեց ԵՄ-ից «հարցնել»: Խորհրդարանական աշխատանքային խումբը հաջորդ շաբաթ կշարունակի ԸՕ-ի շուրջ քննարկումները:
Լուիզա ՍՈՒՔԻԱՍՅԱՆ
