ԱԺ-ում այսօր քաղաքական ուժերի ներկայացուցիչներից բաղկացած աշխատանքային խումբը շարունակում է քննարկել ՀՀ ընտրական օրենսգրքի փոփոխությունների առաջարկները: ՀՀԿ-ի առաջարկներից մեկը՝ ներդնել երկու քվեաթերթիկ, մեկը՝ կուսակցության, իսկ մյուսը՝ թեկնածուի անունով, բանավեճի առիթ տվեց:
«Ծառուկյան» դաշինքի ներկայացուցիչ Նաիրա Զոհրաբյանը կողմ չէ այդ մոդելին: «Նախորդ ընտրություններում ականատես եղանք իրավիճակին, երբ ընտրողներին ասում էին՝ «ինչ ուզում եք արեք, միայն թե ծալեք ԲՀԿ-ի քվեաթերթիկը եւ տեղամասից բերեք դուրս»: Դա զանգվածաբար է եղել»,-ասաց Նաիրա Զոհրաբյանը: Նա մտավախություն ունի, որ նույն խնդիրն առաջիկայում սպասվելիք խորհրդարանական ընտրություններում էլ է գրանցվելու. «Եթե կառաջարկեք մոդել, որտեղ մարդու գործոնը հնարավոր կլինի բացառել, կարծում եմ՝ մենք պատրաստ կլինենք քննարկելու»:
ՀՀԿ ներկայացուցիչ Դավիթ Հարությունյանը Զոհրաբյանի ասածների հետ չհամաձայնեց. «Հասկանում եմ, որ ՀՀԿ-ին «բոբո»-ի տեղ են դրել, բայց մտահոգություններն անտեղի են»: Նաիրա Զոհրաբյանը պնդեց, որ նման դեպքեր գրանցվել են. «Որոշ ընտրատեղամասերում ԲՀԿ-ի քվեաթերթիկ առհասարակ չի եղել»:
Դավիթ Հարությունյանն արձագանքեց. «Ասեք, թե որ տեղամասում է եղել, կդիտենք տեսանկարահանումները եւ կհասկանանք՝ այդ մեղադրանքը մերկապարանո՞ց է, թե ոչ»:
Հավելենք, որ աշխատանքային խումբը դեռ պետք է ընդհանրացնի եւ Կառավարությանը ներկայացնի ԸՕ-ի շուրջ առաջարկները:
Լուիզա ՍՈՒՔԻԱՍՅԱՆ
