Այսօր լուսադեմին ծանրամարտի Հայաստանի մինչեւ 15 եւ 17 տարեկան աղջիկների հավաքականը մեկնում է Միլան՝ մասնակցելու այս տարիքային խմբերի Եվրոպայի առաջնությանը:
Մրցավայր մեկնում է վեց աղջիկ: Հավաքականի ավագ մարզիչ Վիգեն Խաչատրյանը Aravot.am-ին ասաց, որ Իտալիա մեկնում են ոչ միայն մեդալներ նվաճելու, այլեւ Բուենոս-Այրեսի ամառային պատանեկան օլիմպիական խաղերի ուղեգիր նվաճելու նպատակով:
Պատանեկան օլիմպիական խաղերին մասնակցելու իրավունք նվաճած յուրաքանչյուր երկրի տրվում է մեկական տղայի եւ աղջկա վարկանիշ: Վիգեն Խաչատրյանը մեզ տվեց հավաքականում ընդգրկված աղջիկների ցուցակը եւ ասաց, որ ուղեգիր նվաճելու մեծ հույս կա: Նա նշեց նաեւ, որ իր սաները մասնակցելու են միայն մինչեւ 17 տարեկանների առաջնությանը:
Միլանում հանդես կգան. 53 կգ քաշային կարգ՝ Տանզելա Գրիգորյան, 63 կգ՝ Էլեն Հարությունյան, 69 կգ՝ Լիանա Գյուրջյան եւ Միլենա Խաչատրյան, 75 կգ՝ Մարգարիտա Առաքելյան եւ Լուիզա Սահրադյան:
Պատանեկան օլիմպիական խաղերի ուղեգիր ձեռք բերելու համար Իտալիայում անհրաժեշտ է թիմային պայքարում տեղ զբաղեցնել առաջին քառյակում:
Աշոտ ՀԱԿՈԲՅԱՆ
