ԵԱՀԿ/ԺՀՄԻԳ-ը հրապարակել է Ադրբեջանում ապրիլի 11-ին տեղի ունեցած արտահերթ նախագահական ընտրությունների ամփոփիչ զեկույցը, որում երկրի իշխանություններին խորհուրդ է տրվում վերանայել ընտրական օրենսգիրքը մինչև հաջորդ ընտրությունները, գրում է contact.az-ը:
Բացի այդ ԺՀՄԻԳ-ը խորհուրդ է տալիս նաև անկախ և բազմակողմանի հետաքննություն անցկացնել քվեարկության ընթացքում տեղի ունեցած խախտումների վերաբերյալ: Ուսումնասիրության առարկա պետք է դառնան ընտրատեղամասերի տեսախցիկների ձայնագրությունները, ընտրացուցակները, անվավեր ճանաչված քվեաթերթիկները:
Զեկույցի հեղինակները խորհուրդ են տալիս Ադրբեջանի իշխանություններին ընտրական հանձնաժողովի անդամներ նշանակել՝ հանրային վստահությունը բարձրացնելու համար, քանի որ հանձնաժողովի ներկա կազմը նման վստահություն չի ներշնչում:
Հիշեցնենք, ապրիլի 11-ին Ադրբեջանում տեղի ունեցած նախագահական ընտրությունների արդյունքում Իլհամ Ալիևը 4-րդ անգամ ընտրվեց երկրի նախագահ:
Պատրաստեց՝ Վիկտորյա ԱՆԴՐԵԱՍՅԱՆԸ
