Ադրբեջանագետ Տաթև Հայրապետյանի կարծիքով՝ Հայաստանում տեղի ունեցած ներքաղաքական իրադարձությունները նպաստեցին, որ Ադրբեջանում ինչ-ինչ խնդիրներ ավելի ցայտուն ի հայտ գան: «Արմենպրես» մամուլի սրահում լրագրողների հետ հանդիպմանը ադրբեջանագետը զգուշացրեց. «Ալիևի համար դժվար է լինելու կառավարման չորրորդ շրջանը. սա դեռ ավարտը չէ: Օրինակ՝ քաղաքական գործիչներից մեկը ենթադրում էր, որ աշնանն ավելի կսրվեն խնդիրները, քանի որ ամբողջատիրական ռեժիմի թվացյալ վերահսկողությունն իր ճաքերն է տալիս: Բավական է հրաման չլինի, և պետությունն ինստիտուցիոնալ առումով չի կարողանում իր խնդիրները լուծել: Հանձին Ադրբեջանի՝ ավտորիտար ռեժիմի ներքին լուրջ խնդիրներ ունեցող պետության հետ գործ ունենք, և խնդիրները գնալով սրվում են, դրսևորման ձևերն էլ ավելի ագրեսիվ են դառնալու»:
Դառնալով ԼՂ հակամարտությանը և այս փուլում հնարավոր պատերազմական գործողություններին՝ Տաթև Հայրապետյանը նշեց. «Ադրբեջանը միշտ էլ փորձել է ներքին խնդիրները կոծկել, և առաջացել է այս իրավիճակը: Ադրբեջանում ներքաղաքական ներկայիս իրավիճակը գալիս է փաստելու, որ այս փուլում Ադրբեջանին շատ ավելի դժվար, անհնար է լինելու գնալ լայնամասշտաբ ռազմական գործողությունների»:
Ըստ ադրբեջանագետի` քանի որ Ադրբեջանի հասարակությունը դրական արձագանքեց ՀՀ-ում տեղի ունեցած իրադարձություններին, այդ պատճառով այժմ Ադրբեջանի իշխանությունը վախեր ունի, որ նման փորձեր կարող են տեղի ունենալ նաև Ադրբեջանում, ինչը նրանց ստիպում է կանխարգելիչ գործողություններ անել և շեղել հասարակության ուշադրությունը ներքին խնդիրներից՝ նրանց համախմբելով արտաքին թշնամու շուրջ:
Տաթև Հայրապետյանը նկատեց՝ տարօրինակ է այն, որ Գյանջա քաղաքում տեղի ունեցած իրադարձությունների ժամանակ ոստիկաններ սպանվեցին. «Սովորաբար Ադրբեջանում ցույցերից առաջ բոլորին մանրակրկիտ կերպով ստուգում են: Ուստի տարօրինակ է, թե ինչպես զինված մարդիկ հայտնվեցին քաղաքի կենտրոնում, և ինչ պատահեց, որ ոստիկաններ սպանվեցին առանց որևէ միջամտության: Ոստիկաններից մեկն այդ քաղաքի հոգևորականի եղբայրն էր, լուրեր էին տարածվում, որ հոգևորականն էլ խնդիրներ ունի քաղաքապետի հետ: Թնջուկի նման դեպքեր են»:
Դառնալով վարկածներին և Գյանջայի իրադարձություններում հայկական հետքեր փնտրելուն՝ Տաթև Հայրապետյանը նշեց. «Այդ իրադարձությունները փաստում են, որ Ադրբեջանում բազում խնդիրներ կան, և ադրբեջանցի մի շարք փորձագետներ նշում են, որ ներկայիս իշխանությունները պատրաստ են խնդիրները բարդել բոլորի վրա և չվերցնել պատասխանատվություն»:
Ըստ ադրբեջանագետի՝ սկսված ձերբակալությունների ալիքն ընդամենը արտաքին ծածկույթն է. իրականում ներիշխանական պայքարի տարրեր էլ են այստեղ նկատվում:
Դառնալով առաջնագծում ադրբեջանական ռազմական տեխնիկայի կուտակումներին մեր սահմանների մոտ՝ փորձագետ Լիանա Հովհաննիսյանը հայտարարեց. «Սա ակնհայտ սպառնալիք է ուղղված հայկական կողմին, և միջազգային հանրության ադեկվատ արձագանքը կարող է կանխել հերթական ագրեսիան երկու հայկական պետությունների նկատմամբ»:
Ըստ Լիանա Հովհաննիսյանի՝ Ադրբեջանում տեղի ունեցած վերջին իրադարձությունները կարող են ինչ-որ կերպ ազդեցություն ունենալ սահմանային իրավիճակի վրա: Փորձագետը պարզաբանեց. «Սովորաբար հասարակությանը ներքին խնդիրներից շեղելու համար իշխանությունները փորձում են հանրությանը համախմբել արտաքին թշնամու նկրտումների գաղափարի շուրջ: Եվ պատահական չեն այս առումով հնչող հակահայկական հայտարարությունները»:
Տաթև ՀԱՐՈՒԹՅՈՒՆՅԱՆ
