«Մեր քաղաքը համատարած խեղաթյուրումների, ավերածությունների եւ արժեզրկումների համալիր է դարձել»,- հուլիսի 18-ին «Տեսակետ» ակումբում կայացած ասուլիսի ժամանակ ասաց ՀՀ վաստակավոր ճարտարապետ Արտակ Ղուլյանը: Նրա ձեւակերպմամբ` մեր ամենաարժեքավոր ու պետական նշանակության հուշարձաններն են Հանրապետության հրապարակը եւ Օպերային թատրոնի շենքը, սակայն երկուսի հանդեպ էլ վերաբերմունքը եղել է այնպիսին, ինչպես «Ռոսիա» կինոթատրոնի պարագայում: ՀՀ վաստակավոր ճարտարապետը կարծիք հայտնեց, որ վաղուց անցել ենք անթույլատրելիի սահմանը:
Նրա ասելով՝ աղճատվել են կարեւոր, ակնառու շենքեր, որոնցով էլ ճանաչելի է մեր քաղաքը: «Զուգահեռելով կերպարվեստի հետ, մի օրինակ բերեմ, ոչ մեկի մտքով չի անցնի Այվազովսկու «Անդորրություն» կտավի վրա նույնքան անդորր կարապներ պատկերել, անհեթեթ է, բայց ճարտարապետության մեջ դա կա, միջամտում են ուրիշի ստեղծագործությանը»,-ասաց ճարտարապետը:
Մասնավորեցման պարագայում կարեւոր շինությունների վրա անցանկալի փոփոխությունների մասին պարոն Ղուլյանի դիտարկումները` տեսանյութում:
Մշակույթի նախարարության Պատմության ու մշակույթի հուշարձանների պահպանության գործակալության պետ Արմեն Աբրոյանն էլ անդրադարձավ «Զվարթնոց» օդանավակայանի կլոր շենքին, «Ռոսիա» կինոթատրոնին և մի շարք այլ կառույցների, որոնց տրվել է հանրապետական նշանակության հուշարձանի կարգավիճակ: Նրա խոսքերով` 600-ից ավելի հուշարձան նորահայտ հուշարձանի կարգավիճակ ունի, ինչ վերաբերում է քննարկման առարկա 7 հուշարձաններին, դրանք օրերս արժեւորվել են եւ օրենսդրությամբ պահպանվելու են հուշարձանի կարգավիճակով:
Մանրամասները` տեսանյութում
Աղավաղված, խանութների շարքով «խեղդված» եւ դիմագիծը փոխած «Ռոսիա» կինոթատրոնի վերաբերյալ Aravot.am-ի հարցին ի պատասխան էլ պարոն Աբրոյանը ասաց, որ դա կարգավիճակի հետ չի առնչվում, թե ինչ հավելումներ եւ պատմական շերտագրություն ունի, դա օրենսդրությամբ այլ ընթացակարգեր է պահանջում, սեփականատիրոջ իրավունքի խնդիրներ են առաջանում, որոնք բանակցային կամ այլ եղանակով կարող են լուծվել: Նաեւ հավելեց, որ օրենքն ասում է, որ հուշարձանի փոփոխությունը պետք է կատարվի ի նպաստ հուշարձանի:
Մանրամասները` տեսանյութում
Արամ Մանուկյանի արձանին եւ նրա տեղափոխությանն էլ անդրադարձ եղավ: Աբրոյանը չժխտեց, որ արձանը կտեղափոխվի: Նաեւ շեշտեց, որ արձանը տեղադրվել է դեռեւս կարգավիճակ չստացած կառույցի վրա, արձանն էլ տեղադրվել է առանց մշակույթի նախարարության հետ համաձայնեցման, որովհետեւ հուշարձանների պահպանական գոտիների տարածքում է:
Մանրամասները` տեսանյութում
Գոհար ՀԱԿՈԲՅԱՆ
