Եզդի համայնքը ահազանգում է վարչապետին
«Աշխարհի եզդիների ազգային միության» նախագահ Ազիզ Թամոյանն «Առավոտին» է հանձնել 50 ստորագրություններով մի դիմում: Այն ներկայացնում է 40 հազարանոց համայնքը, ինչպես որ գրել են ՀՀ-ում բնակվող ազգությամբ եզդի քաղաքացիները:
«Կան խնդիրներ, որոնք վտանգում են մեր հետագա գոյությունը ՀՀ-ում: Այսպես, 2001 եւ 2011թթ. մարդահամարների արդյունքներով գրանցվել է մոտ 40 հազար եզդի: Իսկ քրդերի թվաքանակը 2200 է, որն իրականում կեղծ է, քանի որ Հայաստանում կա միայն մեկ քուրդ ընտանիք: Միաժամանակ պետք է ասել, որ Քրդական բանվորական կուսակցությունն իր օղակներն է ստեղծել Հայաստանում, մասնավորապես, Արագածոտնի մարզում ՔԲԿ-ն Ռյա Թազա համայնքում ունի գրասենյակ: Այն տարածում է իր գաղափարները»,- ասվում է դիմումում:
Դիմումատուները տեղեկացնում են, որ վերջերս Գերմանիայում քրդամետ «Ճրա» հեռուստաընկերությամբ լուսաբանվել է Քրդական բանվորական կուսակցության ներկայացուցիչ, Թուրքիայի քաղաքացի ոմն Դաուդի եւ Հայաստանում միակ քուրդ Կնյազ Հասանովի հանդիպումը:
Այս կապակցությամբ եզդի համայնքն ահազանգում է. «Արագածոտնի մարզի Ալագյազ, Սիփան, Ջամուշվան, Ճարճակիս եւ Ավշեն համայնքների եզդիներին նրանք համարում են քրդեր: Բացի այդ, Արագածոտնի մարզը նրանք համարում են քրդական տարածք՝ գծելով քարտեզներ»:
Ըստ Ազիզ Թամոյանի, անվտանգությանն ուղղված այդ քայլը պայմանավորված է Շանգալի դեպքերի հետ, երբ ըստ նրա՝ «մեր փոքրաթիվ ժողովրդի գոյությունը վտանգված է, որոշ ուժեր փորձում են Հայաստանում էլ կեղծելով իրականությունը, քրդացնել եզդիներին»:
Զրուցակիցս մեջբերում է «Զագրոս» քրդական թերթից 10-12-րդ դասարանցիների համար նախատեսված «քրդերենի» դասագրքերից: Նա հարցնում է. «Ո՞ւմ համար են դրանք հրատարակվում: Մեզ համար անհայտ է: Հայաստանում ի՞նչ քրդերի եւ քուրդ դպրոցականների մասին է խոսքը, «Զագրոս» թերթը ինչո՞ւ է գրում քրդական եւ քրդաբնակ գյուղերի մասին, որոնք, որպես այդպիսին, չկան»:
Ըստ Ա. Թամոյանի, քրդական գյուղեր Հայաստանում չկան:
Նախորդ վարչապետին ուղղված գրոււթյունից հետո Արագածոտնի մարզպետ Գոզալյանի աշխատասենյակում հանդիպում է տեղի ունեցել Ալագյազ, Սիփան, Ջամուշվան, Ճարճակիս եւ Ավշեն համայնքների ղեկավարների, դպրոցների տնօրենների հետ:
Դիմումի հեղինակները գրում են. «Այդ հանդիպման ժամանակ ՏԻՄ ղեկավարներն ու դպրոցի տնօրենները հայտարարեցին, թե իրենք եզդի են: Մարզպետն էլ գրավոր պատասխանել է, թե բնակիչները եզդի են: Եթե եզդի են, ի՞նչ հիմքով են նրանց «քրդերեն» ուսուցանում: Երբ նշյալ գյուղերի բնակիչների անձնագրերում, ծննդյան վկայականներում նույնպես նշվել է, որ նրանք ազգությամբ եզդի են»:
Եզդի համայնքը պահանջում է Արագածի մարզի նշյալ հինգ գյուղերում արգելել քրդերենի դասավանդումը եզդի երեխաներին, քանի որ երեխաների ծննդյան վկայականներում, նրանց ծնողների ամուսնության վկայականներում, անձը հաստատող փաստաթղթերում գրված է ազգությունը եզդի:
«Խնդրում ենք փակել «Զազրոս», «Ռյա Թազա» թերթերը, քրդերեն կեսժամյա հաղորդումը, որոնք մոլորեցնում են հանրությանը, «Ճրա» հեռուստաընկերության աշխատակիցների գործունեությունը»,- ասվում է դիմումում:
ՌՈՒԶԱՆ ՄԻՆԱՍՅԱՆ
Հ.Գ.-Ի դեպ, նկատենք, որ ՀՀ ԱԺ պատգամավոր Ռուստամ Մախմուդյանը եզդի համայնքի կողմից դիտվում է որպես քրդամետ քաղաքական գործիչ:
Ակնկալում ենք բարձրաձայնվածի վերաբերյալ պատգամավորի պատասխանը:
«Առավոտ»
17.07.2018
