Այսօր ՊՆ կենտրոնական հավաքակայանում առողջապահության նախարար Արսեն Թորոսյանից լրագրողները հետաքրքրվեցին, թե ի՞նչ կարծիք ունի գերքաշություն, թերքաշություն, հեմոգլոբինի բարձր մակարդակ ունեցող եւ գիշերամիզությամբ տառապող տղաներին բանակ զորակոչելու որոշման մասին: «Դիագնոզների մասով ոչինչ չեմ կարող ասել: Կարող եմ ասել, որ այդ որոշումը ընդունվելուց հետո միանգամից դրվեց փոփոխությունների ու, եթե հիշողությունս չի դավաճանում, անցած կառավարության նիստին ընդունվեց, շտկվեցին որոշ թերություններ»,-ասաց նախարարը: Նրա դիտարկմամբ՝ «Եթե փորձագետները կարծում են, որ ասենք 45 կիլոգրամը կարելի է իջեցնել 42-ի, ու զորակոչել, իմ կարծիքը գերակշիռ չի կարող լինել: Ես բժիշկների բժիշկը չեմ, որ որոշեմ, թե ով է պիտանի ծառայության, ով՝ ոչ: Նման խնդիրները միշտ վերանայվել են»:
Նախարարը նաեւ ասաց, որ փորձելու են նախազորակոչային շրջանում լուծել ապագա զորակոչիկների առողջական խնդիրները: Օրինակ՝ 16 տարեկանում, եթե քթի միջնապատի կամ ատամների խնդիր ունի, ապա կամ վիրահատեն, կամ ատամները բուժեն, որպեսզի զորակոչի ժամանակ խնդիր չլինի, ու այդ տղաները ճանաչվեն պիտանի ու հետագայում զորամասերում այդ խնդիրները չլուծեն:
Նելլի ԲԱԲԱՅԱՆ
