Այս օրերին Հայաստանում եւ Արցախում սեմինարներ ու գործնական մարզումներ է անցկացնում բրազիլական ջիու-ջիցուի եւ նոգի ջիու-ջիցուի աշխարհի չեմպիոն, տարբեր կազմակերպությունների վարկածով հեղինակավոր խառը մենամարտերի մարտիկ Ալբերտո Քրեյնը: Նա նաեւ Լոս-Անջելեսում ջիու-ջիցուի հիմնադիրներից է:
Ալբերտո Քրեյնը ամուսնացած է հայուհու՝ Էդիթ Քեշիշյանի հետ, ունի մեկ տղա՝ Սեւանը եւ երկու աղջիկ՝ Սոնան եւ Սերինեն:
Ալբերտո Քրեյնը սիրով համաձայնեց հարցազրույց տալ Aravot.am-ին:
-Դուք երկրորդ անգամ եք գալիս Հայաստան: Այս անգամ ի՞նչ ծրագիր ունեք:
-Ընտանիքիս հետ եկել եմ հանգստանալու: Բայց ցանկանում եմ օգնել, որպեսզի ջիու-ջիցուն զարգանա Հայաստանում: Միեւնույն ժամանակ ամբողջ աշխարհին ուզում եմ տեղեկացնել, որ Հայաստանում ջիու-ջիցու, առավել եւս՝ բրազիլական ջիու-ջիցու կա: Իսկ բրազիլական ջիու-ջիցուն, հնարավոր է, շուտով դառնա օլիմպիական մարզաձեւ:
-Հայաստանում եւ Արցախում ջիու-ջիցուի մակարդակի մասին ի՞նչ կասեք:
-Հայաստանում ջիու-ջիցուն նոր մարզաձեւ է, բայց այս կարճ ժամանակի համար շատ լավ վիճակում է:
-Ջիու-ջիցուն ինքնապաշտպանության հիանալի միջոց է տարբեր իրավիճակներում: Ձեր կարծիքով Ադրբեջանի հետ կիսապատերազմական վիճակում գտնվող Հայաստանի համար այն ի՞նչ դեր կարող է խաղալ:
-Հայաստանի իրավիճակին, անշուշտ ծանոթ եմ: Բայց իմ մարզաձեւն անհրաժեշտ է բոլոր մարդկանց՝ անկախ նրանից, թե կիսապատերազմակա՞ն վիճակում են, թե՞ խաղաղ պայմաններում: Ես հավատում եմ ջիու-ջիցուին եւ կյանքս նվիրել: Այն հրաշալի է բոլորի համար, փոքր երեխաներից մինչեւ մեծահասակներ՝ առանց տարիքային սահմանափակման: Այն պետք է ինչպես մարմնի, այնպես էլ հոգու, ոգու եւ հանգստության համար: Ջիու-ջիցուն շատ ավելին է, քան կտվելը: Սա մի գործիք է, որով կարելի է հասնել սեփական ներուժի ողջ էությանը: Հետեւաբար, ջիու-ջիցուն անհրաժեշտ է ոչ միայն տարբեր իրավիճակներում գործնական ինքնապաշտպանության, այլեւ ինքնազարգացման համար:
Հայաստանի ջիու-ջիցուի եւ գրեփլինգի ֆեդերացիայի գործունեության եւ ծրագրերի մասին ֆեդերացիայի նախագահ Ռուբեն Միրիբյանի հետ հարցազրույցը կարդացեք տպագիր «Առավոտի» առաջիկա համարներից մեկում:
Աշոտ ՀԱԿՈԲՅԱՆ
