ՀՀ մարդու իրավունքների պաշտպան Արման Թաթոյանն անընդունելի է որակում հուլիսի 14-ին Ամենայն հայոց կաթողիկոս Գարեգին Բ-ի հանդեպ վերջինիս հրաժարականը պահանջող «Նոր Հայաստան, նոր հայրապետ» նախաձեռնության անդամների վերաբերմունքը:
Հիշեցնենք, որ նրանք շրջափակել էին Վեհափառ հայրապետի մեքենան, խոչընդոտել նրա տեղաշարժը, սպառնալիքներ հնչեցրել:
«Կարծում եմ՝ այս ամենը վտանգավոր է ու մտահոգիչ: Հարցը պետք է օրենքի շրջանակում լուծվի: Հայ Առաքելական եկեղեցին բացառիկ դեր ունի մեր համար, այն ազգային արժեքներից է: Եթե հարցը մյուս կողմից դիտենք, կարևորում եմ դավանանքի ազատության ապահովումը»,-լրագրողների հետ զրույցում այսօր ասաց Արման Թաթոյանը, նշելով, թե այդ գործողություններում բռնության միտումներ է նկատել:
Իսկ թե ինչպես պետք է խնդիրը կարգավորվի, ՄԻՊ-ը դժվարացավ պատասխանել, առավել եւս, որ դա իր իրավասությունների մեջ չի մտնում. «Յուրաքանչյուր անձ կարող է բողոքել ինչ-որ խնդրի առնչությամբ, բայց անընդունելի է, երբ իրականացվում են բռնություններ, երբ խախտվում են մարդու իրավունքները»:
Ինչ վերաբերում է երեկ վարչապետ Նիկոլ Փաշինյանի հայտարարությանը, թե ինքը չի միջամտելու հարցին, Արման Թաթոյանը նշեց. «Ես չեմ կարող կարծիք հայտնել այդ հայտարարության մասին, բայց պետք է արձանագրել, որ եկեղեցին անջատ է գործում պետությունից»:
Լուիզա ՍՈՒՔԻԱՍՅԱՆ
