ՀՀ Արդարադատության նախարար Արտակ Զեյնալյանն այսօր լրագրողների հետ ճեպազրույցում անդրադարձավ «Արմավիր» քրեակատարողական հիմնարկի մի շարք կալանավորների՝ համաներման պահանջով իրականացվող հացադուլին: «Համաներումն իրավունք չէ, այլ տրամադրվելիք արտոնություն: Դա պահանջի ձեւով ներկայացնելը չի բխում դրա էությունից»,-ընդգծեց Արտակ Զեյնալյանը:
Լրագրողները հետաքրքրվեցին, թե արդյոք առաջիկայում, այնուամենայնիվ, նախատեսվում է համաներում:
«Համաներում կլինի, թե ոչ, կախված է իշխանության եւ հասարակության կամքից: Արդյոք իրավունքի խախտման՝ հանցագործության զոհերը կամ նրանց հարազատները պատրա՞ստ են ներել իրենց իրավունքները խախտած անձանց»,-հարցադրում արեց նախարարը:
Ապա եզրափակեց. «Համաներումը հիմնահարց է, որը հացադուլով չպետք է լուծվի: Եթե դրա ժամանակը գա եւ հասարակությունն ու իշխանությունը նման կամք դրսեւորեն, հարցը կքննարկվի»:
Լուիզա ՍՈՒՔԻԱՍՅԱՆ
